ئئه‌لهۆیێن دهۆكێ ناسناڤه‌كێ دیرۆكى بده‌ستڤه‌ئینا
بەلاڤ بکە
یانه‌یا دهۆكێ بوو قاره‌مانا جاما كه‌نداڤى
یانه‌یا دهۆك یا وه‌رزشى ئه‌ڤ شه‌ڤه سه‌ركه‌ڤتنه‌كا دیرۆكى همبه‌ر یانه‌یا قادسیه یا كوێتى د چارچووڤه‌یێ قاره‌مانیا یانه‌یێن كه‌نداڤى ب 2 گۆلان به‌رانبه‌ر گۆله‌كێ تۆماركر وه‌كى ئێكه‌م یانه‌یا ئیراقێ چوو د دیرۆكێ كو ڤى ناسناڤى ب ده‌ستڤه بینیت.
ب ئاماده‌بوونا سه‌رۆكێ حكومه‌تا هه‌رێما كوردستانێ، مه‌سروور بارزانى و 25 هزار پشته‌ڤانان ل ناڤا یاریگه‌ها دهۆك یا وه‌رزشى و ته‌ماشه‌كرنا ملیۆنان پشته‌ڤانان ژ ده‌رڤه‌ى یارێگه‌هێ، ئه‌لهۆیێن چیا شییان ب دو گۆل به‌رانبه‌ر گۆله‌كێ ژ یانه‌یا قادسیه یا كویتێ ببه‌ن و ناسناڤه‌كێ دیرۆكى تۆمار بكه‌ن، گۆلا ئێكێ ل خوله‌كا 65ێ و گۆلا دووێ ل حوله‌كا 92ێ هاتنه تۆماركرن. سه‌ركه‌ڤتنا یانه‌یا دهۆكێ نه بتنێ دهۆكى، به‌لكور سه‌ركرده‌یێن هه‌رێمێ و هه‌موو كورد دلخۆشكرن.
د په‌یامه‌كا پیرۆزباهیێ دا، سه‌رۆكێ هه‌رێما كوردستانێ نێچیرڤان بارزانى خۆشحالیا خۆ ب ڤێ سه‌ركه‌ڤتنێ نیشاندا و پیرۆزباهییا یانەیا دهۆکێ دکەت و راگەهاند: ژ دل و ب گەرمی پیرۆزباهییا یانەیا دهۆکێ دکەم، ئەم هەمی شانازییێ ب یانەیا دهۆکێ و ڤێ سەرکەفتنێ دکەین.
ژلایێ خۆڤه سه‌رۆكێ حكومه‌تا هه‌رێما كوردستانێ مه‌سروور بارزانى د په‌یامه‌كێ دا پیرۆزباهیەکا گەرم ل تەڤ یاریزانێن دهۆکێ وخەلکی باژێرێ دهۆکێ و کوردستانێ ب گشتی كر بۆ ب دەستڤەئینانا جاما خولا قارەمانێن کەنداڤی. گۆت ژى، ئەڤ سەرکەفتنا مەزن جهێ شانازیا مە هەمیانە.
ل ناڤا یاریگه‌ها دهۆكێ و ل مه‌یدان و جاده‌یێن دهۆكێ و قه‌زایێن سه‌ر ب پارێزگه‌هێ ژى ڤه وه‌لاتیان ئه‌ڤ سه‌ركه‌ڤتنه ب ئاهه‌نگ و دیلانان پیرۆز كر.
خولا قاره‌مانێن كه‌نداڤى ل سالا 1981ێ ده‌ستپێكرى یه و یانه‌یێن وه‌لاتێن كه‌نداڤى پشكداریێ تێدا دكه‌ن، ژ سالا 2015ێ قاره‌مانى راوه‌ستیابوو، ڤى وه‌رزى سه‌ر ژنوى ده‌ستپێكریه‌ڤه و بۆ ئێكه‌م جاره د دیرۆكا قاره‌مانیێ دا یانه‌یه‌كا ئیراقى پشكداریێ تێدا دكه‌ت.
یانه‌یێن شه‌باب یا ئیماراتى و ئه‌هلى یا سعودى خودانێن پترین ناسناڤانه د دیرۆكا قاره‌مانیێ دا و هه‌ر ئێك ژ وان 3 جاران بوویه قاره‌مانێن كه‌نداڤى.
