ئاڤاک ئیشخان ئارشاک

کۆمەلکوژیا ئەرمەنان ژلایێ تورکیا ڤە ل سالا 1915 رێکەفتی 24/4 دەستپێکر هەتا سالا 1923ێ ب دویماهی هات ب مەرەما ژناڤبرن و ژناڤچوونا ئەرمەنان،  ل دویڤ هندەك ژێدەران، ئێك ملیۆن هەتا ملیون و نیڤ کەسان ژ خەلکێ ئەرمەن ب دەستێ عوسمانیان و عەشیرەتا هاوپەیمانان ڤە هاتنە کوشتن و بێ سەروشوینکرن.

لسەردەمێ سولتان عەبدولحەمیدێ دویێ یێ عوسمانیان و ل گەل پیلانێن ئەنوەر پاشا، تەلعەت پاشا، جەمال پاشا و تەشیکلاتێن عوسمانییان و دەزگەهێ ھەواڵگیریێ عوسمانییان و سوپایێ حەمدییە ل باژێرێن ستەنبۆل، یوزگات، ئەنقەرە، قەیسەری، موغڵا، وان، سێواس، بدلیس، موش، ئەدەنە، ترابزون، ھاتای، ئزمیر، ئەفیون، ئیزمیی، ئەسکی شەھیر، مانیسا و کاستامۆن زێدەتر ژ 50 باژێر و ناوچێن دیتر ل ژێر دەستێ ئمپراتۆریەتا عوسمانی ئێك ملیۆن و 500 هزار ئەرمەنی هاتنە کۆمەلکوژ کرن، نێزیکی 500 هزار ئەرمەنێن دی ژی ل جهـ و مال و حالێ خوە دا بۆ ناوچێن دویر وەك دێەرزور و بیابانێن ناڤەراستا سووریێ هاتنە ڤەگوهاستن.

پتر ژ 60 وەلات و رێکخراوێن جیهانێ کۆمەلکوژیا ئەرمەنان وەکو جینوساید ناساندیە و ئەمریکا ب ڤێ دەستەواژێ ناڤ دکەت “ Meds Yeghern “ کو ب رامانا “ کارەساتا مەزن “ دهێت. داخازێ ژ ئیراق و هەرێما کوردستانێ ژی دکەین کۆمەلکوژیا ئەرمەنان وەکو جینۆساید بناسیت.

ئەڤرۆ 110 سال بسەر جینۆسایدکرنا ئەرمەنان ڤە دەربازدبن، هەر سال رێکەفتی 24ێ نیسانێ، ئەرمەنێن هەمی جیهانێ ب گشتی ئەڤێ روژێ ب ریورەسم ساخ دکەن و ئەڤێ رۆژێ ب رۆژەکا رەش و کارەساتەکا مەزن و نەخوش دزانن ئەوا کو د دەرحەقا مروڤایەتیێ دا و مروڤێن بێگونەهـ هاتی ئەنجامدان.