نێچیرڤان بەرواری

‎پشتی د هەردو یارییێن بۆری دا یانەیا دهۆکێ نەشیایی سەرکەفتنێ تۆمار بکەت، ب تایبەتی دەمێ ل گەل یانەیا کارەبا تووشی شکەستنێ بوویی، ژ لایێ پشکەکا پشتەڤانێن یانا دهۆك ڤە هێرشەکا توند ل سەر تیما دهۆکێ هاتە کرن، ب تایبەتی ل سەر هێرشبەرێ یانەیێ "پاشەنگ عەبدولا''ی. ئەڤ رەخنە د دەمەکی دا نە کو ب تنێ چەند رۆژەك یێت دەربازبووین ل سەر ب بدەستڤەئینانا دەستکەفتەکێ دیرۆکی کو ئەو ژی برنا جاما کەنداڤییە، پا گەر ئەڤ پشتەڤانە ل جهێ جەماوەرێ یانەیا ئیتیفاق یا سعوودی بان، دبیت داخوازا سێدارەدانا ڤینالدۆمی کربا، ژ بەر کو هەڤبەستا وی ب تنێ زێدەتری 12 ملیۆن یۆرۆیانە کو ل بەرانبەر وێ یانەیا دهۆک ب گربەست و هەمی مەزاختییێن تیمێن خوە ڤە ناگەهیتە سێ ملیون دولاران، لێ ئەڤا مە دیتی جەماوەرێ ئیتیفاق رێز ل یاریکەرێن خۆ گرت. ئەم ژ بیر نەکەیین قادسیا کوێتی ژی نە تیمەکا ب ساناهی بوو، بەلێ دەمێ ناسناڤ ژ دەست دایی، قەت جەماوەرێ وان هێرش نەکرە ل سەر یانەیا خۆ، بەروڤاژی پیرۆزباهی ل دهۆکێ کر و دەستخۆشی ل یاریکەرێن خۆ کر. هەروەسا ئەڤە هەر ئەو تیمە ئەوا د ناڤ یاریگەها زەورا دا ل بەر چاڤێن جەماوەرێ وان و ب یارکەرەکێ کێمتر، سەرکەفتن تۆمارکری، لێ جەماوەرێ زەورا بەردوام پشتەڤانییا تیما خۆ کر ئاخفتنێن نە ژ هەژی نەگۆتنە یاریکەرێن خۆ. 

‎پتر ژ 10 یانەیێن عیراقێ زێدەتری یانا دهۆکێ پارە مەزاختینە، هند ژ وان دوجارکی و سێجارکی ژ دهۆکێ پتر پارە مەزاختینە، لێ یانەیا دهۆکێ وەکو ئاست و ئەنجام ژ گەلەک ژ وان باشترە.

‎رەخنەکرن مافێ هەمی جەماوەری و رۆژنامەڤانانە، بەلێ هێرشکرن و گۆتنا ئاخفتنێن نەجوان ژ هەژی وێ تیمێ نینن یا کو ئەڤ خەلکە هەمی دلخوەش کری، چ تیم نینن تووشی شکەستنا نەبن، ل بیرا مە هەمیانە دەمێ ل دەستپێکێ مەسعوود میرال هاتییە دهۆکێ، هەمان رەوش پەیدا بوو و گەلەک ژ جەماوەری هێرش کرنە ل سەر وی، لێ نوکە د خۆلا عیراقێ دا ئەو ئێک ژ باشترین راهێنەرانە، ئەڤجا دەلیڤەدان و رەخنەیێن ئاڤاکەر باشترن ژ هێرشکرن و خرابکرنێ.