گاڤ

ل گۆرەیی زانیارییێن تایبەت یێن گاڤ، سەرۆکوەزیرێ ئیراقێ،  یانەیا دهۆکێ خەلات کر و سەرۆکێ یانەیێ ژی، سێ داخوازی گەهاندنە وی و وی ژی سۆز دا دویڤچوونێ بکەت.

ئەڤرۆ، پێنجشەمبی، 24-04-2025، یانەیا دهۆکێ سەرەدانا محەمەد شیاع سوودانی، سەرۆکوەزیرێ ئیراقێ کر و ب گەرمی هاتە پێشوازیکرن.

شڤان محەمەد، بەرپرسێ راگەهاندنا یانەیا دهۆکێ تایبەت بۆ گاڤ دا زانین، سوودانی، سوپاسی و دەستخۆشی ل یانەیا دهۆکێ کر و دەستکەفتێ وان وەکی شانازیەک بۆ هەرێم و ئیراقێ ب ناڤ کر،  د. عەبدولا جەلال، سەرۆکێ یانەیا دهۆکێ ژی سوپاسییا وی کر و سێ داخوازی ژێ کرن.

هەروەسا دیار کر، هەرسێ داخوازییێن سەرۆکێ یانەیا دهۆکێ ئەڤە بوون:

• وەکی یانەیێن ئیراقێ، مافێن دارایی یێن هەر چار یانەیێن کوردستانێ 'دهۆک، زاخۆ، هەولێر و نەورۆز' ژی بهێنە دان.
• ئەو پاداشتێ بۆ یانەیێن ئیراقێ ل دەمێ پشکدارییا د قارەمانییێن دەرڤە دا دهاتە دان، بدەنە یانەیا دهۆکێ ژی.
• پارە بۆ یاریگەها باسکتبۆلێ یا یانەیا دهۆکێ بهێنە مەزاختن کو 70٪ تەمام بوویە.

ئەو ژی گۆت: ژ ئالییێ خۆ ڤە سوودانی سۆز دا کو دویڤچوونێ ل سەر ڤێ چەندێ بکەت یان پارەیێ پێدڤی بمەزێخیت.

15ـی نیسانا ئەڤ سالە یانەیا دهۆکێ بەرانبەری یانەیا قادسییە شیا ب ئەنجامێ 2-1 سەرکەفتنێ بئینیت و جاما یانەیێن کەنداڤی، وەک ئێکەم یانەیا هەرێما کوردستانێ و ئیراقێ ب دەست خۆ ڤە بئینیت.