گاڤ

ئەڤرۆ، گەرا سێیێ ژ دانوستاندنێن تەکنیکی دناڤبەرا ئەمریکا و ئیرانێ دا ل عومانێ ب دویماهی هاتن. وەزیرێ دەرڤە یێ راگەهاند؛ ب چ رەنگان کارنامەیا کۆمبوونێن خۆ نا گوهۆرین و بتنێ دێ بەحسی بەرنامەیێ ئەتۆمی کەین.

ئیسماعیل بەقایی، پەیڤدارێ وەزارەتا دەرڤە یا ئیرانێ، ئەڤرۆ، شەمبییێ، 2025-04-26، بۆ میدیایێن وەلاتێ ئیرانێ گۆت؛ دانوستاندنێن مە یێن نەراستەوخۆ ل گەل ئەمریکا د سه‌قایه‌كێ جددی دا د بەردەوامن، مە بۆچوونێن خۆ ل دۆر کێمکرنا سزایان و بەرنامەیێ ئەتۆمی ئالۆگۆر کرن.

عەباس عەراقچی، وەزیرێ دەرڤە یێ ئیرانێ پشتی کۆمبوونێ راگەهاند؛ ب چ رەنگان کارنامەیا کۆمبوونێن خۆ نا گوهۆرین و بتنێ دێ بەحسی بەرنامەیێ ئەتۆمی کەین.

میدیا یا فەرمی یا وەلاتێ ئیرانێ دیارکر؛ دانوستاندنا ئەڤرۆ درێژتر بوو ژ جارێن بۆری. ب ناڤبەینکارییا عومانێ ل مەسقەتا پایتەختێ وی وەلاتی هاتە برێڤەبرن. شاندێن هەردو ئالییان پێکدهاتن هەر ئێک ژ عەباس عەراقچی، وەزیرێ دەرڤە یێ ئیرانێ و ستیڤ ویتکۆف، نوینەرێ تایبەت یێ سەرۆکێ ئەمریکا بۆ رۆژهەلاتا ناڤین.

دو جارێن دى دانوستاندنێن نه‌راستوخۆ دناڤبه‌را ئیران و ئه‌مریكا دا هاتینه‌ كرن و جاره‌كێ ل رۆما  و جارا دى ل عومانێ هاتینه‌ كرن و هه‌ر دو وه‌لات تا نوكه‌ ژى گه‌فان ل ئێك دكه‌ن.