گاڤ

سەرۆک نێچیرڤان بارزانی، ئەڤرۆ، ل گەل شاهێ وەلاتێ ئۆردنێ کۆمبوو. پشتی کۆمبوونەکا بەرهەمدار سەرۆک نێچیرڤان بارزانى، تابلۆیەکا ئامێدییێ یا نیگارکێشەکێ دهۆکێ پێشکێشی شاهێ وی وەلاتی کر.

نێچیرڤان بارزانی، سەرۆکێ هەرێما کوردستانێ، ئەڤرۆ، ئێکشەمبییێ، 2025-04-27، د چارچووڤەیێ سەرەدانا خۆ دا بۆ وەلاتێ ئۆردنێ، ل گەل شاھ عەبدوللایێ دویێ کۆمبوو. پشتی کۆمبوونا ل گەل شاهێ وی وەلاتی، سەرۆک نێچیرڤان بارزانى، تابلۆیەکا ئامێدییێ یا نیگارکێشەکێ دهۆکێ پێشکێشی وی کر.

خەیری ئادەم، مامۆستایێ پەیمانگەها هونەرێن جوان یا دهۆکێ یە، خودانێ تابلۆیا ناڤبری یە.

خەیری ئادەم تایبەت بۆ گاڤ گۆت:: پێشتر ژی، چەندین جاران، سەرۆک نێچیرڤان بارزانی، تابلۆیێن من پێشکێشی سەرکردەیان کرینە و تابلۆیا  'پێکڤەژیانێ' ئەوا کو سەرۆک نێچیرڤانی پێشکێشی پاپایێ فاتیکانێ کری، هەر ژ داهێنانا من بوو.

ئەڤرۆ رۆژا ئێکشەمبییێ، 2025-04-27، سەرۆک نێچیرڤان بارزانی ل عەمانا پایتەختا ئوردنێ ل گەل شاهـ عەبدوللایێ دویێ، شاهێ ئۆردنێ کۆمبوو و ژمارەیەکا بابەتان بەحسکرن.

ل گۆرەی بەیانەکا سەرۆکایەتییا هەرێما کوردستانێ، د کۆمبوونا سەرۆک نێچیرڤان بارزانی و شاهـ عەبدولایی دا بهێزکرنا پەیوەندیێن شاهنشینا ئۆردنێ و هەرێما کوردستانێ و ئیراقێ، هەروەسا بەرفرەهکرنا هاریکارییان د بیاڤێ سیاسی، ئابووری و ئەمنی دا بەحسکرن، دەربارەی دویماهی پێشهاتێن دەڤەرێ و جیهانێ ژی دا هەردو ئالیان دانوستاندن کرن.