گاڤ

وەزارەتا ناڤخۆ یا هەرێما کوردستانێ د بەیانەکێ دا رێنماییێن نوی بۆ تۆمارکرنا تەکسییان ئێخستنە  د وارێ بجهئینانێ دا و دبێژیت؛ مەرەم ژ ڤێ چەندێ ئەوە تەکسی بهێنە نویکرن.

وەزارەتا ناڤخۆ یا هەرێما کوردستانێ ئەڤرۆ رۆژا دوشەمبی، 28-04-2025، رێنماییێن نوی بۆ تۆمارکرنا تەکسییان بەلاڤکرن و گۆتییە: پشتی کو بۆ دەمەکێ درێژ تۆمارکرن راوەستیایی، دیسان دێ دەستپێکەتەڤە.

وەزارەتا ناڤخۆ گۆتییە: ژمارەیا تەکسییان زێدەنابن، یێ بڤێت تەکسییەکا نوی تۆمار بکەت، پێدڤییە تابلۆیا خۆ یا کەڤن بکاربئینیت.

هەروەسان دیار کرییە؛ ئەو تەکسییا تابلۆیا وێ بۆ تەکسییەکا نوی دهێتە بکارئینان، دێ بیتە ترومبێلەکا تایبەت و ئەو تەکسییا دبیتە ترومبێلا تایبەت، تابلۆیا وێ یا تایبەت دێ بێ بەرانبەر بیت.

ئاماژە دایە وێ چەندێ ژی کو؛ ئەگەر تەکسی، هایبرێد یان تەمام کارەبایی بیت، رسۆماتێن تۆمارکرنێ ژێ ناهێنە وەرگرتن.

هەروەسا د بەیانا وەزارەتا ناڤخۆ دا هاتییە؛ د شیاندایە 74 جۆرێن ترومبێلێن هایبرێد و تەمام کارەبایی و 89 جۆرێن ترومبێلێن پانزینێ ببنە تەکسی.