گاڤ

وەزارەتا دارایی یا هەرێما کوردستانێ رۆهنکرنەک ل دۆر هژمارەکا دەنگۆیان بەلاڤکر و تێدا گۆتییە؛ مە تنێ داخوازا مووچەیەکی بۆ فەرمانبەرێن بانکی کریە.

رێڤەبەرییا گشتی یا بانکێن بازرگانی یا سەر ب وەزارەتا دارایی و ئابووری یا هەرێما کوردستانێ ڤە، ئەڤرۆ رۆژا سێشەمبییێ، 29-04-2025، رۆهنکرنەک بەلاڤکر کو تێدا هاتییە؛ د هندەک پەیج و میدیایان دا، نووچەیەک بەلاڤبوویە کو تێدا دیار دبیت؛ وەزارەتا دارایی یا ئیراقێ تێبینی ل سەر لیستا مووچەیێ هەیڤا نیسانێ یێ فەرمانبەرێن هەرێما کوردستانێ هەیە و ئێک ژ تێبینییان ل سەر مووچەیێ بانکێن حکومی بۆ هەیڤا نیسانێ بوویە کو دیار کرییە داخوازا دو مووچەیان بۆ بانکان هاتییەکرن و د ناڤ لیستێ دا ناڤێ سێ بانکان هاتییە ژبیرکرن و پاشی هاتییە چارەکرن.

هەروەسا دیارکرییە؛ مە ب پێدڤی زانی کو بۆ هەمی ئالییەکی رۆهن بکەین، ڤی نووچەیی چو بنەمایەک نینە و بۆ هەیڤا نیسانێ ژی وەکی هەیڤێن دی، بۆ فەرمانبەرێن بانکان تنێ داخوازا مووچەیەکی هاتییەکرن و چ گۆهورین د لیستا مووچەیی دا نەهاتییەکرن.

وەزارەتێ تێبینییەک ژی بەلاڤکرییە و تێدا هاتییە؛ ل دویڤ یاسایێ هەر چەندە داخوازا دو مووچەیان بۆ فەرمانبەرێن بانکان تشتەکێ ئاساییە و سالانە ل ئیراق و هەرێمێ فەرمانبەرێن بانکان 15 مووچەیان وەردگرن کو سێ مووچە زێدەهینە.