گاڤ

هندستانێ ب مووشه‌كان هێرشى پاكستانێ كر و زێده‌تر ژ 40 كه‌سان كوشتن، پاكستانێ ژى ئاشكراكر، هنده‌ك جهـ ل نێزیك باژێڕێ موزه‌فه‌ر ئاباد بووینه‌ ئارمانج، هندستان ژى دبێژیت: 70 چه‌كدار هاتینه‌ كوشتن.

به‌رێ سپێده‌هییا ئه‌ڤرۆ چارشه‌مبێ 7-5-2025ێ سوپایێ هندستانێ هێرشى پاكستانێ كر و وه‌زاره‌تا به‌ره‌ڤانییا هندستانێ راگه‌هاند، 9 ژێرخاێن تیرۆرستان هاتینه‌ ژناڤبرن و هێرش ل ناوچه‌یێن داگیركرى یێن كشمیرێ و جامۆ بوو.

ژ ئالیێ خۆ ڤه‌ وه‌زاره‌تا به‌ڕه‌ڤانییا پاكستانێ ئاشكراكر، هێرش ل هنده‌ك جهێن كشمیرێ هاتیین كرن و هنده‌ك جهـ ل نێزیك باژێڕێ موزه‌فه‌ر ئاباد بووینه‌ ئارمانج.

ل گۆڕه‌یى ئامارێن فه‌رمى یێن پاكستانێ 40 كه‌س د هێرشان دا هاتینه‌ كوشتن كو 20 ژ وان سڤیلن و 42 كه‌س ژى بریندار بووینه‌.

هندستانێ راگه‌هاند، د هێرشا شڤێدى دا 24 مووشه‌ك ئاراسته‌یى كه‌شمیر هاتینه‌ كرن و 70 چه‌كدار هاتینه‌ كوشتن و 60 ژى بریندارن، وه‌زاره‌تا به‌رگرییا هندستانێ ئه‌ڤ یه‌كه‌ ئه‌ڤرۆ ده‌مژمێر 11:30 خۆله‌كى سپێدێ راگه‌هاندییه‌.