ئه‌مریكا: مایێ خۆ د شه‌ڕێ هندستان و پاكستانێ ناكه‌ین
بەلاڤ بکە
جێگرێ سه‌رۆكێ ئه‌مریكا جه‌ی دی ڤانس، ئه‌ڤرۆ راگه‌هاند، قه‌یرانا نها یا دناڤبه‌را هندستان و پاكستانێ دا چ په‌یوه‌ندى ب وانڤه نینه، هه‌ڤده‌م خواست ئالۆزى بهێنه كێمكرن.
جه‌ی دی ڤانس د دیداره‌كێ دا دگه‌ل كه‌نالێ فۆكس نیوز گۆت: "ئه‌وا دشێن بكه‌ین، ئه‌وه هانبده‌ین، بۆ كێمكرنا ئالۆزیان، لێ ئه‌م پشكدارى شه‌ڕه‌كى نابین كو كارێ مه نینه".
ل 7ى ڤێ هه‌یڤێ هندستانێ هێرشه‌كا 25 خوله‌كى یا ئاسمانى و ده‌ریایی كره سه‌ر پاكستانێ و راگه‌هاند "هه‌مى كه‌مپێن تیرۆرستان و جهێن هه‌لدانا مۆشه‌ك و فرۆكه‌یێن درۆن ژناڤبرینه ل ناوچه‌یا جام و كشمیر یا پاكستانێ".
ژ لایێ خۆڤه، پاكستانێ راگه‌هاند، وان به‌رسڤا هێرشان دایه و هژماره‌كا فرۆكه‌یێن هندستانێ ئێخستینه.
د هێرشێن هه‌ردو ئالیان دا، تا نها پتر ژ 100 كه‌سان گیانێ خۆ ژ ده‌ستداینه و ئالۆزى دناڤبه‌را هه‌ردو وه‌لاتێن خودان چه‌كێ ئه‌تۆمى دا به‌رده‌وامن.
