په‌كه‌كێ كۆنگره‌یێ خۆ گرێدا
بەلاڤ بکە
پارتا كاركه‌رێن كوردستانێ په‌كه‌كێ راگه‌هاند، كۆنگره‌یێ خۆ یێ 12ێ دناڤبه‌را 5 بۆ 7ى ڤێ هه‌یڤێ ل هه‌رێمێن پاراستنا مه‌دیا سه‌ركه‌ڤتیانه گرێدایه و دێ ئه‌نجامێن كۆنگره‌ى ل ده‌مه‌كێ نێزیك ئاشكه‌را كه‌ت.
كۆنگره‌یێ په‌كه‌كێ، لسه‌ر داخوازا رێبه‌رێ وێ حزبێ عه‌بدوللا ئۆجالان هاته گرێدان، كو ئۆجالانى خواستبوو، په‌كه‌كه د كۆنگره‌ى دا خۆ هه‌لوه‌شینیت و ده‌ست ژ خه‌باتا چه‌كدارى به‌رده‌ت.
پارتا كاركه‌رێن كوردستانێ د راگه‌هاندنه‌كێ دا به‌لاڤكر، دوازده‌مین كۆنگره‌یێ وێ حزبێ ل رۆژێن 5 بۆ 7ى گۆلانێ ل چیایێن كوردستانێ ب پشكداریا نوینه‌رێن هه‌مى بواران ل دو جهێن جودا و د ئێك ده‌مدا سه‌ركه‌ڤتیانه هاتیه گرێدان.
په‌كه‌كێ راگه‌هاند، ژى كۆنگره‌یێ وان لسه‌ر داخوازا رێبه‌رێ وان عه‌بدولا ئۆجالان هاتیه گرێدان و ل ده‌ستپێكا كۆنگره‌ى ب رێز و حورمه‌ت سلاڤ ل ئۆجالانى هاته كرن، ئه‌و پیشنیازێن ئۆجالانى پێشكیشى كۆنگره‌ى كرین هاتنه خواندن و هه‌لسه‌نگاندن بۆ هاته كرن، هه‌روه‌سا راپۆرتا كورت یا كۆمیته‌یا ناڤین یای په‌كه‌كێ ژى هاته خواندن و دانوستاندن لسه‌ر هاته كرن.
په‌كه‌كێ دا زانین، ژى د كۆنگره‌ى دا، ل دویڤ بانگه‌وازیا ئۆجالانى، بریاره‌كا گرنگ و دیرۆكى ده‌رباره‌ى كارێ په‌كه‌كێ هاتیه دان.
د راگه‌هاندنا په‌كه‌كێ دا هاتیه ژى، كۆنگره‌یێ وان یێ 12ێ د هه‌یڤا گولانێ دا (هه‌یڤا شه‌هیدان) برێڤه چوو، ئه‌و بیرا خۆ ل هه‌مى شه‌هیدێن تێكوشینا خۆ یا 52 سالى دئینن.
ژ هه‌مى گه‌لێ كورد و هه‌مى هێزێن دیمۆكرات و سۆسیالیست ژى خواست، كو ب دروستى ل بهایێن نه‌ته‌وه‌یی و دیمۆكراتى خودان ده‌ركه‌ڤن كو ژ ئه‌نجامێ 52 سالێن خه‌باتا وان هاتینه بده‌ستڤه‌ئینان و د هه‌مى هه‌لكه‌فتان ژى شه‌هیدێن وان نه‌هێنه ژبیركرن.
په‌كه‌كێ دا زانین، دێ زانیاریێن هویر و به‌رفره‌هـ ل ده‌مه‌كێ نێزیك پشتى ئێكخستنا ئه‌نجامێن هه‌ر دو جهێن كۆنگره لێ هاتیه كرن، بۆ رایا گشتى هێنه به‌لاڤكرن.
