ده‌م پارتى: كۆنگره‌یێ په‌كه‌كێ گاڤه‌كا دیرۆكى یه
بەلاڤ بکە
گاڤ
پارتا وه‌كهه‌ڤى و دیمۆكراسیێ ده‌م پارتى، ده‌رباره‌ى گرێدانا كۆنگره‌یێ په‌كه‌كێ راگه‌هاند، به‌ربانگا نوى یا ئاشتى و برایه‌تیێ ده‌ستپێدكه‌ت گۆت ژى، ئێدى دڤێت په‌ڕله‌مانێ تركیا رۆلا خۆ د چاره‌سه‌كرنا پرسا كوردى دا بگێریت.
ئه‌ڤرۆ پارتا كاركه‌رێن كوردستانێ په‌كه‌كێ راگه‌هاند: وان كۆنگره‌یێ خۆ ل چیایێن كوردستانێ گرێدا و بڕیاره‌كا گرنگ و دیرۆكى لسه‌ر بانگا عه‌بدوللا ئۆجالانى دا، دیاركر ژى، ئه‌نجامنامه‌یا كۆنگره‌یێ وان یێ 12ێ ل ده‌مه‌كێ نێزیك دێ هێته راگه‌هاندن. كو چاڤه‌رێ یه هه‌لوه‌شاندنا خۆ راگه‌هینیت و ده‌ست ژ خه‌باتا چه‌كدارى به‌رده‌ت.
پارتا وه‌كهه‌ڤى و دیمۆكراسیێ ده‌م پارتى ژى ئێكسه‌ر پشتى راگه‌هاندنا په‌كه‌كێ راگه‌هاندنه‌ك به‌لاڤكر كو تێدا هاتى یه، ب گرێدانا كۆنگره‌یێ په‌كه‌كێ گاڤه‌كا دى نێزیكى ئاشتیێ بوون، دیاركر ژى، ئه‌لنده‌كا نوى یا ئاشتى و براتیێ ده‌ستپێدكه‌ت.
به‌حسێ رۆلێ ئۆجالانى ژى كر و ب به‌رپرساتیه‌كا دیرۆكى د پیشڤه‌برنا پێڤاژۆیێ دا بناڤكر. هیڤیى ژى خواست ئاشتى ل تركیا ببیته هیڤیه‌ك بۆ رۆژهه‌لاتا ناڤین.
ده‌م پارتى دبێژیت، پشتى ڤێ وه‌رچه‌رخانا دیرۆكى، دڤێت هه‌مى سازیێن سیاسى و دیمۆكراسى، ب تایبه‌تى په‌ڕله‌مانێ تركیا ب رۆلێ خۆ راببن بۆ چاره‌سه‌ركرنا پرسا كوردى.
