گاڤ

بازرگانێ مەزن یێ ئەمریکی، بیل گەیتسی راگەهاند: دێ دناڤبەرا دو دەهسالێن بهێت دا، نێزیکی هەمی پارەیێ خۆ کو 200 ملیار دۆلارن، ب رێکا سازییێن بیل و ملێینیدا گەیتسێ دەمە رێکخراوێن خێرخوازی و ل 31ـێ کانوونا دویێ یا سالا 2045ێ ب فەرمی دێ هێنە دائێخستن.

سازییا گەیتس ل سالا 2000ـێ هاتییە دامەزراندن و بارەگەهێ وێ یێ سەرەکی ل سیاتلێ یە، وەک مەزنترین سازییا خێرخوازی یا تایبەت ل جیهانێ دهێتە نیاسین، بەری نوکە نێزیکی 100 ملیار دۆلاران ل سەرانسەری جیهانێ بۆ کارێن خێرخوازی و کێمکرنا هەژارییێ و بەرفرەهکرنا دەرفەتێن خواندنێ مەزاختینە.

د راگەهاندنەکێ دا، خودانێ وێ بیل گەیتس، بازرگانێ مەزن یێ ئەمریکی راگەهاند: من نەڤێت ب زەنگینی بمرم، دێ کارێن خۆ یێن خێرخوازی بەرفرەهتر کەم و تەکەزێ کەینە سەر رێگریکرنا ل مرنا دایک و زارۆکان، دێ بەرهەنگاری نەخۆشییێن کوژەک بین و هاریکارییا هەژاران کەین.

گەیتسی هەروەسا گۆت: ب رێکا سازییێن خۆ ب رەنگەکێ بەرچاڤ دێ کارێن خێرخوازی بەرفرەهتر کەین و ل سالا 2025ـێ 9 ملیار دۆلارن مەزێخین و داخوازێ ژ هەمی زەنگینان دکەین، هاریکارییا هەژاران بکەن.

گەیتسی گۆت: دێ نێزیکی هەمی سامانێ خۆ ئانکو 200 ملیار دۆلاران ل دو دەهسالێن بهێت بۆ کارێن خێرخوازی مەزێخم و ئەڤە کردارەکا ئەخلاقی یە، پێدڤی ناکەت مرۆڤی ئەو هەمی پارەیە هەبن د دەمەکی دا دشێت ژیانا ملیۆنان هەژاران باشتر بکەت، ئەز وەکی خێرخوازێ ب ناڤودەنگ ئەندرۆ کارنێگی هزر دکەم؛ ئەو زەلامێ ب زەنگینییەکا مەزن ڤە دمریت، ب شەرمزاری ڤە دمریت و من بریار دایە پشتی مرنا من کەس نەبێژیت؛ زەنگینەک مر.

بەیل گەیتس، بازرگان و گەشەپێدەرەکێ نەرمەکالایان و خێرخوازەکێ ئەمریکی یە. ل سالا 1975ێ هەڤپشکێ کۆمپانییا مایکرۆسۆفت بوویە لێ نوکە پشکێن وی د وێ کۆمپانییێ دا گەلەک کێمبووینە. ئێکە ژ مەزنترین ملیاردێرێن جیهانێ. نوکە نێزیکی 200 ملیار دۆلاران هەنە و د ناڤ لیستا 15 ملیاردێرێن دەستپێکی یێن جیهانێ دا یە.