گاڤ - تایبەت

سیاسەتمەدارەکێ  کورد د دیدارەکێ دا بۆ گاڤ راگەهاند؛ رۆلێ سەرۆک نێچیرڤان بارزانى هەمی دەمان بۆ پێشڤەبرنا پرۆسەیا ئاشتییێ هاریکار بوویە و دڤێ دۆسییێ دا بوویە.

عه‌بدوللا سالح، سیاسەتمەدارێ  کورد، ئەڤرۆ، شەمبییێ، 2025-5-10، د دیدارەکێ دا ل گەل گاڤ، راگەهاند؛ رۆلێ سەرۆک نێچیرڤان بارزانى هەمی دەمان بۆ پێشڤەبرنا پرۆسەیا ئاشتییێ هاریکار بوویە و دڤێ دۆسییێ دا بوویە.

دیارکر ژی؛ بۆ ڤێ قویناغا نوکە ب رەنگەکێ فەرمی پرۆسەیا ئاشتییێ دەستپێنەکرییە، چونکی مەرجێن تورکیا ئەو بوون کو پەکەکە خۆ هەلبوەشینیت، چەکی بدانیت و پشتی هینگێ پرۆسەیا ئاشتییێ دەستپێبکەت.

ئاماژە ب هندێ ژی دا؛ دهێتە چاڤەرێکرن پەکەکێ بڕیارا دانانا چەکی و خۆهەلوەشاندنێ دابیت و داخوازا هندێ بکەت ئۆجەلان ب رەنگەکێ فیزیکی بهێتە بەردان.

سەبارەت پشکدارییا عەبدوللا ئۆجەلانی د کۆنگرەیێ وان دا ب شێوەیێ ئۆنلاین گۆت ژی؛ بێگومان پشکدارییا وی دێ کاریگەرییا وی مەزنتر بیت ژ نامەیا وی بۆ کۆنگرەیی نڤیسی.

دیار ژی کر؛ ب دیتنا من ئۆجەلان گەهشتییە وێ باوەرییێ، کوشتن و بڕین د قازانجێ کەسێ دا نینە، نە بۆ خەلکێ کوردستانێ نە بو تورکیا.

سەبارەت رۆلێ سەرۆک نێچیرڤان بارزانى د پرۆسەیا ئاشتییێ دا گۆت ژی؛ سه‌رۆك نێچیرڤان بارزانى رۆله‌كێ گرنگ د بجهئینانا پرۆسەیا ئاشتییێ دا ل توركیا هه‌بوویە.

پێشتر سەرۆکێ پارتییا نژادپەرست یا تورکیێ (مەهەپە) د گۆتارەکێ دا راگەهاندبوو: ئەڤە دەهان شەڕەکێ ب خوین [یێ پەکەکێ] بوویە بەلایا سەرێ مللەتێ مە و ئەم یێ دویماهییا ڤی شەڕی دبینین، دڤێت پەکەکە ب هەمی دارودەستێن خۆ ڤە نەتنێ چەکی بدانیت لێ دڤێت چەکێن خۆ رادەستی کۆمارا تورکیێ بکەت.

دەولەت باخچەلی، سەرۆکێ پارتییا نژادپەرست یا تورکیێ د گۆتارەکێ دا دیسان دوپاتی ل پەیەما عەبدوللا ئۆجەلان، رێبەرێ زیندانیکری یێ پەکەکێ کربوو و دیارکربوو: پەیاما ئیمرالییێ پەکەکێ و هەمی رێکخراوێن سەر ب وێ ڤە ڤەدگریت و پێدڤییە چەکێ خۆ رادەست بکەن.

گۆتبوو ژی؛ "پێدڤیە یەپەگە و هەمی گرۆپێن هەڤشێوە یێن پەکەکێ خۆ ب هەلوەشینن و چەکێ خۆ رادەست بکەن و پەیام وان هەمییان ڤەدگریت و نابیت یارییێ ب دەمی بکەن یان پرۆسەیێ ئالۆز بکەن، ئەگەر نە دێ ب توندی بەرسڤا وان دەین" باخچەلی ب ڤی رەنگی ژی گەف کربوون.

پشتی پەیاما عەبدولا ئۆجەلانی یا کو تێدا داخوازکری پەکەکە کۆنگرەیێ خۆ ساز بکەت و تێدا خۆ بهەلوەشینیت، باخچەلی گۆتبوو ئەڤ پەیامە یا ب نرخە، پەکەکێ ژی بەرسڤا ڤێ چەندێ دا بوو و گۆتبوو ئەم بەرهەڤین ڤێ چەندێ بکەین لێ دڤێت ئۆجەلان ب خۆ سەرپەرشتییا کۆنگرەیی بکەت.