گاڤ

سەرۆکێ ئەمریکا د چارچووڤەیێ سەردانا خۆ دا بۆ رۆژهەلاتا ناڤین، رێککەفتنەک ب بهایێ 1.2 ترلیۆن دۆلاران ل گەل قەتەرێ کر. کۆچکا سپی راگەهاند؛ بازرگانی دناڤبەرا هەردو وەلاتان دا بۆ 243.5 ملیار دۆلاران دێ بلند بیت.

د چارچووڤەیێ سەردانا خۆ دا بۆ رۆژهەلاتا ناڤین، ئەڤرۆ، چارشەمبییێ، 2025-5-14، دۆنالد ترەمپ، سەرۆکێ ئەمریکا گەهشتە وەلاتێ قەتەرێ و ل گەل شێخ تەمیم بن حەمەد ئالسانی، میرێ قەتەرێ کۆمبوو.کۆچکا سپی راگەهاند؛ رێککەفتنەک ب بهایێ 1.2 ترلیۆن دۆلاران ل گەل قەتەرێ هاتە کرن و ئەڤ رێککەفتنە دێ سەرجەمێ بازرگانییێ دناڤبەرا هەردو وەلاتان دا بۆ 243.5 ملیار دۆلاران بلند کەت.

دیارکر ژی؛ ئەڤ رێککەفتنە بەردەستکرنا 210 فڕۆکەیێن بۆینگ بۆ هێلا ئەسمانی یا قەتەر ب بهایێ 96 ملیار دۆلاران ب خۆ ڤە دگریت.

هەروەسا ترەمپی گۆت ژی؛ بهایێ گرێبەستا وان ل گەل قەتەرێ دێ زێدەتر بیت ژ 200 ملیار دۆلاران و گەلەک فڕۆکەیێن بۆینگ ب خۆ ڤە دگریت.

ل 2025-5-13، سێشەمبییێ، دۆنالد ترەمپ، ب سەرەدانەکا فەرمی گەهشتە وەلاتێ سعوودیێ و ژ ئالییێ محەمەد بن سەلمان، شازادەیێ تاجپارێز یێ سعوودییێ ڤە هاتە پێشوازیکرن. کۆچکا سپی راگەهاندبوو؛ هەردو ئالییان رێککەفتنەکا ئابووری یا وەبەرهێنانێ ل ئەمریکا ب بهایێ 600  ملیار دۆلاری کر.

پێشتر کارۆلین لیڤیت، پەیڤدارا کۆچکا سپی راگەهاندبوو؛ سەرۆکێ ئەمریکا ل 13ـێ تا 16ـێ گولانێ دێ سەرا هەرسێ وەلاتێن سعوودیە، قەتەر و ئیماراتێ دەت.

پشتی دەستبکاربوونا سەرۆکێ ئەمریکا ئەڤە گەشتا دویێ یا نێڤدەولەتییە ژ ئالییێ وی ڤە دھێتەکرن. هەڤدەم ب مەرەما پشکداریکرنێ د بەهیا پاپا فرانسیس دا ئێکەم سەرەدانا وی بۆ ڤاتیکانێ بوو.

سەردانا ترەمپی بۆ رۆژهەڵاتا ناڤین، ئێکەم گەشتا فەرمی یا ترەمپی یە، د خۆلا دویێ یا سەرۆکایەتییێ دا.