زاگروس فەتاح

 ژ دەستپێکا کابینا نەهێ، هەردەم مە ژ سەرۆکوەزیران کاک مەسروور بارزانی بهیستییە، کو کابینە گرنگییەکا زۆر ددەتە هەمەجۆرکرنا ئابۆری و ئارمانجا وی ئەوە کو کوردستان د وارێن جودا جودا دا گەشەبکەت و بتنێ پشت ب نەفتێ و ئێک ژێدەری نەگرێدەت. لڤێرە ژ بۆ خەلکێ کوردستانێ گرنگە کو بتەمامی بۆ وان ڕوون بیت، ئایا ئەڤە بتنێ دروشم بوو، یان کابینا نەهێ ب دروستی و زانایانە سوزێن خۆ جێبەجێكرن و هەرێما کوردستانێ برە قویناغەکا دی؟

بۆ بەرسڤا ڤێ پرسیارێ، جێبەجێکرنا ب دەهان پرۆژێن گرنگ د وارێن ڕێکوبان و ووزە و کارەبا و چاندن و دروستکرنا سایلۆ... هتد، سەلمێنەرێن وێنە کو کابینا نەهێ کابینا بەرهنگاربوونا قەیرانان و جێبەجێکرنا پرۆژێن ستراتیژی یێن گرنگ بوو.

د ڤێ نڤیسینا من دا، مەرەما من نە ئەوە، دەستکەفت و پرۆژێن کابینا نەهێ ڕێز بکەم و ئاماژێ پێ بدەم، چونکی خەلکێ کوردستانێ شاهد و گەواهیدەرێن دەستکەفت و خزمەتێن کابینێ نە و هەروەسا شاهدێن هەمی وان قەیران و ئالنگاریێن ناڤخۆیی و ئیراقی و هەرێمی نە کو کابینا نەهێ شیا بەرهنگاری وان ببیت.

چەند ڕۆژێن بەری نوکە و ب دیاریکری ل 12/5/2025 ، سەرۆکوەزیران کاک مەسروور بارزانی، ب فەرمی (پرۆژێ چیمەنتۆ و کارەبا دابین) ڕاگەهاند، کو ئێکە ژ گرنگترین پرۆژێن پیشەسازی یێن ستراتیژی لسەر ئاستێ هەرێما کوردستانێ و ئیراقێ.

مەرەما من ئەوە ژ چەند ڕوویانڤە ل سەر لسەر ڤی پرۆژێ ستراتیژی یێ پیشەسازی یێ گرنگ باخڤم:

ئێك: ئاڤاکرنا پرۆژێن پیشەسازی یێن مەزن ل کوردستانێ و ئیراقێ کارەکێ ب زەحمەت و دژوارە.

لایێ هەمییان یا دیارە، وەلاتێن پێشکەفتی یێن ئەورۆپا و هندەک ژ وەلاتێن ڕۆژهەلاتێ ئاسیا، پێشەنگ و هەڤرکێن وارێ پیشەسازی نە و وەلاتێن ڤێ دەڤەرێ و ب تایبەتی ئیراق و هەڤشێوەیێن وێ د وارێ پیشەسازی دا پاشکەفتینە و ژ کاروانی پاشڤە ماینە، ئەڤێ چەندێ وەکریە کو پێشکەفتن د کەرتێ پیشەسازی دا ل ڤێ دەڤەرێ، کارەکێ دژوار بیت، لێ خۆشبەختانە کابینا نەهێ د ڤی واری دا ژی دەستبەردار نەبوو، ئەڤ پرۆژێ ستراتیژی یێ گرنگ ژی کرە سەر خەرمانێ دەستکەفت و پێشکەفتنێن خۆ بۆ کوردستانێ.

ئەڤ پرۆژە؛ ژبلی ڕەخساندنا (1200) دەلیڤێن کاری یێن نوی، ڕۆژانە (6300) تەنێن چیمەنتۆی، بەرهەمدئینیت.

دووەم: ڕاکێشانا وەبەرهێنانا بیانی بۆ هەرێما کوردستانێ

(پرۆژێ کارگەها چیمەنتۆ و کارەبا دابین)، ژ لایێ کۆمپانیا (پاوەر چاینا) کو کۆمپانیەکا هەرە مەزنە یا ناڤدەولەتییە، ب هەڤپشکی دگەل کۆمپانیا (دابین) کو کۆمپانیەکا خۆمالییە، ب بەهایێ زێدەتر ژ 200 ملیۆن دۆلاران هاتییە جێبەجێکرن.

هاتنا کۆمپانیەکا مەزن یا ناڤدەولەتی بۆ وەبەرهێنانەکا وەسا مەزن ل هەولێرێ، سەلمێنەرێ وێیە کو دلنیایی و باوەریەكا ناڤدەولەتی یا مەزن هەیە بۆ سەقامگیریا هەولێرێ و هەرێما کوردستانێ، ئاخر ئەڤ وەبەرهێنانا کو ڤێ کۆمپانیێ د ڤی پرۆژەیدا کری ب سالەکێ و دوو سالان كوژمێ پرۆژێ ناکەڤیتە دەست و پشتی چەندین سالان کارکرن ل هەرێما کوردستانێ دشێت وی پارەی وەرگریتەڤە، ئەڤە ژی نیشانا وێیە کو وەلات و کۆمپانیێن مەزن یێن جیهانێ، مەرەما وان ئەوە كو  ل کوردستانێ ستراتیجییانە و درێژخایەن کاری تێدا بکەن، باوەریا وان ب حوکمرانیا نوکە یا کوردستانێ و سوزو و بەرنامێن سەرۆکوەزیران هەیە و دزانن کو کوردستان د گەشەکرنا بەردەوامدایە و چاڤێ وان لوێیە کو هەڤپشکیێ بکەن د وێ گەشەکرنێدا.

بێگومان ڕۆلێ کۆمپانیا (دابین) ژی وەک کۆمپانیەکا کوردی یا خۆمالی، د ڤێ وەبەرهێنانا گرنگدا، گەلەک بەرچاڤ و گرنگە و جهێ دەستخۆشی و سوپاسداریەكا زۆرە.

سێیەم: ژینگەهـ پارێزی و گرێدانا وێ دگەل پێنگاڤێن ئاڤەدانی و پێشکەفتنێ

گرنگیدان ب ژینگەهێ و بنەمایێ ژینگەهـپارێزیێ، ئێکە ژ بنەمایێن سەرەکی و پیرۆز یێن ڕێبازا پیرۆز یا بارزانی، پارتی دیموکراتی کوردستان و جەنابێ سەرۆکوەزیران، د ڕژدن لسەر پاراستن و لبەرچاڤگرتنا بنەمایێ ژینگەهـپارێزیێ د هەر پرۆژە و پێنگاڤەكا پێشکەفتن و ئاڤەدانیێ دا، هەر ژ بەر هندێ د دەمەکێ دا  کو پیشەسازیا چیمەنتۆی ب گشتی د بیتە ئەگەرێ پیسبوونا ژینگەهێ، لێ د ڤێ کارگەهێدا ب ڕێکا بکارئینانا تەکنەلۆژیا پێشکەفتی، فلتەرێن تایبەت هاتینە دروستکرن دا کو پاشماوێن زیانبەخش بهێنە فلتەرکرن و کاریگەریا نەباش لسەر ژینگەها کوردستانێ نەبیت.

چوارەم: سەرکردێ ژێهاتی و زانا

ئەوا د پێشەکی و سێ خالێن سەرێ ڤێ نڤیسانێ دا ئاماژە پێ هاتییە دان، بێگومان سەرکردە و حوکمرانەکێ زانا و ژێهاتی و ب سەلیقە ل پشتە و شیایە وەک سەرۆکوەزیرانێ کابینا نەهێ ڕێبەرایەتیا ڤان دەستکەفت و پێشکەفتنان بکەت و بناغە و ژێرخانەکێ بۆ پیشەسازی و چاندن و ئابووریا کوردستانێ ئاڤا بکەت، گەلەک ژ وێ پشتڕاستین کو ب ڕێبەرایەتیا کاک مەسرور بارزانی کابینا دەهێ دشێت ڤێ ژێرخانا پیشەسازی و چاندنێ و ئابووری یا خۆ بپارێزیت و بهێزتر بکەت و کوردستانا مە هەردەم ئاڤەدانتر و سەقامگیرتر بکەت.