سه‌رۆك نێچیرڤان بارزانى د ڤان دو رۆژان دا
بەلاڤ بکە
گاڤ
نێچیرڤان بارزانى، سه‌رۆكێ هه‌رێما كوردستانێ دێ سه‌ره‌دانا ته‌هرانا پایته‌ختێ ئیرانێ كه‌ت و پشكدارى كۆربه‌نده‌كى بیت.
هه‌رێما كوردستانێ په‌یوه‌ندیێن بهێز دگه‌ل كۆمارا ئسلامیا ئیرانێ هه‌نه و د ماوه‌یێ ئێك سال دا، چه‌ندین جاران سه‌ركرده‌یێن هه‌رێمێ ژ وان ژى سه‌رۆك نێچیرڤان بارزانى سه‌ره‌دانا ئیرانێ كرینه.
محەممەد کازم ئال سادق، بالیۆزێ كۆمارا ئیسلامیا ئیرانێ بۆ میدیایێن وه‌لاتێ خۆ راگه‌هاند، د دو رۆژێن بهێن دا، نێچیرڤان بارزانى، سه‌رۆكێ هه‌رێما كوردستسانێ ب سه‌ره‌دانه‌كا فه‌رمى دێ ل ئیرانێ بیت.
بالیۆزێ كۆمارا ئیسلامیا ئیرانێ، دا زانین، ئارمانج ژ سه‌ره‌دانا نێچیرڤان بارزانى پشكداریكرنه د (كۆربه‌ندێ دانوستاندنێن ته‌هرانێ دا) كو ژ لایێ ناڤه‌ندا ڤه‌كۆلینێن سیاسى و نێڤده‌وله‌تى سه‌ر ب وه‌زاره‌تا ده‌رڤه‌یا وى وه‌لاتیڤه برێڤه دچیت. كۆربه‌ند دێ ل رۆژێن ئێكشه‌مب و دوشه‌مبێ برێڤه دچیت.
سه‌عید خه‌تیبزاده، سه‌رۆكێ ناڤه‌ندا ڤه‌كۆلینێن سیاسى و نێڤده‌وله‌تى ژى دا زانین، ژ 53 وه‌لاتێن جیهانێ دێ پشكدارى د كۆربه‌ندى دا هێتـه كرن.
ل ده‌ستپێكا هه‌یڤا گۆلانا سالا بۆرى، سه‌رۆك نێچیرڤان بارزانى ب سه‌ره‌دانه‌كا فه‌رمى چوو ئیرانێ و دگه‌ل رێبه‌رێ بلندێ كۆمارا ئیسلامیا ئیرانێ عه‌لى خامه‌نه‌ئى و سه‌رۆكێ وه‌غه‌ركرى یێ وى وه‌لاتى ئیبراهیم ره‌ئیسى كۆمبوو.
هه‌ر ل 22 وێ هه‌یڤێ سه‌رۆك نێچیرڤان بارزانى، دگه‌ل سه‌رۆكێ حكومه‌تا هه‌رێما كوردستانێ، مه‌سروور بارزانى، پشكدارى ریوره‌سمێن ڤه‌شارتنا ته‌رمێ ئیبراهیم ره‌ئیسى بوون.
ل 30ى هه‌یڤا تیرمه‌ها سالا بۆرى ژى، سه‌رۆك نێچیرڤان بارزانى، پشكدارى رێوره‌سمێن ده‌ستبكاربوونا سه‌رۆكێ هه‌لبژارتیێ ئیرانێ ئیبراهیم ره‌ئیسى بوون.
