ئه‌مریكا بۆ لیبیایێ: ملیۆنه‌كا وه‌لاتیێن غه‌زه وه‌ربگره دێ پارێن ته ئازاد كه‌م
بەلاڤ بکە
GAV
كه‌نالێ ئێن بى سى نیۆز یێ ئه‌مریكى، به‌لاڤكرى یه: ئیداره‌یا دۆنالد تره‌مپى كار بۆ ڤه‌گوهاستنا ملیۆنه‌كا وه‌لاتیێن غه‌زه بۆ لیبیا دكه‌ت به‌رانبه‌ر ئازادكرنا ملیاران دۆلارێن بلۆككرى یێن لیبیا.
ل گۆره‌ى وى كه‌نالى، دۆنالد تره‌مپى گۆتى یه، خه‌لكێ غه‌زه ژ برساندا دمرن و ژ به‌ر ڤێ ئێكێ ب ره‌نگه‌كێ جددى دگه‌ل لیبیا لسه‌ر خه‌ته بۆ ڤه‌گوهاستنا وه‌لاتیێن فلستینى ژ كه‌رتێ غه‌زه بۆ لیبیا.
بۆ ماوه‌یێ پتر ژ 10 سالانه ئه‌مریكا ده‌ستێ خۆ دانایه سه‌ر ملیاران پاره‌یێ لیبیا یێ سه‌رده‌مێ سه‌رۆكێ پێشتر موعه‌مه‌ر قه‌زافى و هاتیه بلۆككرن.
كه‌نالێ ئێن بى سى نیۆز، ژ زارێ دو به‌رپرسێن ئه‌مریكى ئاشكراكر، ئیداره‌یا دۆنالد تره‌مپى، ب نهێنى و جددى كار لسه‌ر بجهئینانا پلانا ڤه‌گوهاستنا خه‌لكێ غه‌زه دكه‌ت و بۆ ڤێ ئێكێ ژى سه‌ركرده‌یێن لیبی ژى هاتینه ئاگه‌هداركرن.
