گاڤ

عەبدوللا ئۆجالانی ل گزیرتەیا ئیمرالییێ پەیامەکا نوی بەلاڤکر و تێدا دیار کر: برایەتییا کورد و تورکان یا جودایە، برا شەڕی دکەن، لێ بێی ئێک نابن.

ئەڤرۆ ئێكشەمبی، 18-05-2025، پارتییا دیمۆکراتی و ئێكسانییا گەلان د پەیامەکێ دا راگەهاند؛ بۆ دیتنا عەبدوللا ئۆجالانی ئەڤرۆ مە سەرەدانا گزیرتەیا ئیمرالییێ کر و ئۆجالانی پەیامەک راگەهاندییە.

پەیاما ئۆجالانی دبێژیت: ئەز پەشیمانبووم کو من دویماهی دیدار ل گەل سرری سوورەییا ئۆندەری نەبوو، ئەو کەسەکێ ژیربوو و ئەم ناهێلین جهێ وی ڤالا بمینیت.

ئۆجالانی هەروەسا گۆتییە: برایەتییا کورد و تورکان یا جودایە، برا شەڕی دکەن، لێ بێی ئێک نابن. ئەوا ئەم دکەین دیار دکەت کو گوهۆرینێن مەزن هەنە و ئەم پێدڤی ب پەیمانەکا نوی یا برایەتییێ نە.

هەروەسا گۆت ژی: ئەم مژویلی پاقژکرنا وان تەلهە و میناینە یێن بۆ ڤێ برایەتییێ هاتینە ڤەدان و ئێک-ئێکە دێ رێکان سەخبێر کەین.

د دویماهییا پەیاما خۆ دا ئۆجالانی گۆتییە: سوپاسییا ئالان بادیۆ و سلاڤۆی ژیژەکێن رەوشەنبیر دکەم کو نامە و پەیام بۆ من هنارتینە و ب هیڤییا وێ یەکێ وان د خەباتا هەڤپشک یا ناڤدەولەتی و سۆسیالیست دا ببینم.

ل 27-02-2025، د پەیامەکێ دا عەبدوللا ئۆجالان، رێبەرێ زیندانیکرییێ پەکەکەیا خۆهەلوەشاندی، راگەهاند: پەکەکە د ناڤبەرا دو شەرێن جیهانی دا چێبوو، نوکە ژی ئەو دەم هاتییە کو پەکەکە خۆ بهەلوەشینیت و پێدڤی یە زمانێ ئاشتی و دیمۆکراسیێ بهێتە پێشخستن.

 د پشکەکا دی یا پەیاما خۆ دا ئۆجالانی گۆت: "گوهێ خۆ بدەنە من و چەکێ خۆ بدانن، ئەز دێ بەرپرساتیا دیرۆکی یا دانانا چەکی هەلگرم".

ئۆجالانی هەروەسا گۆت: "پێدڤی یە کورد و تورک بۆ مانا خۆ پێکڤە بژین ژبۆ کو ل دژی هێزێن هەژموونخواز ل سەر پێیێن خۆ بمینن و هەردەم پێدڤی ب ئێک و دو یە.

ل 12-05-2025، ل دویڤ پەیاما ئۆجالانی پەکەکێ کۆنگرەیێ خۆ سازکر و خۆ هەلوەشاند.