كۆنفرانسێ رۆلێ كوردین ده‌رڤه‌ى وه‌لات د دیالۆگا كوردى – كوردى دا
بەلاڤ بکە
كۆنفرانسێ رۆلێ كوردین ده‌رڤه‌ى وه‌لات د دیالۆگا كوردى – كوردى دا
مامۆستایه‌كێ زانكۆیا سۆفیا: كورد 4 پارچه نینن، 400 پارچه‌نه
گاڤ
د كۆنفرانسى دا، سه‌رۆكێ ئه‌نجومه‌نێ نیشتیمانى – كوردى ئه‌نه‌كه‌سێ ل رۆژئاڤایێ كوردستانێ و ههڤسهرۆكا جڤاتا سوریایا دیمۆكراتى مه‌سه‌دێ باس ل پێشهاتێن نوى یێن سووریێ و چا‌وانییا چه‌سپاندنا مافێن كوردان د ده‌ستوورێ نوى یێ سووریێ دا كرن. نوونه‌رێ حزبا دیمۆكراتا كوردستانا ئیرانێ ژى باس ل بزاڤێن هه‌ڤگرتنا ئالیێن رۆژهه‌لاتێ كوردستانێ كر، ب گشتى ژ ئالیێ پشكداربوویان باس ل رۆلا كوردێن دیاسپۆرایێ د ڤى واریدا هاته كرن.
كۆنفرانس ئه‌ڤرۆ ئیڤارى ب رێكا ته‌له‌كۆنفرانسێ برێڤه‌چوو، پتر ژ 200 سه‌رۆك و نوونه‌رێن حزبان، سازیێن جڤاكا سڤیل، چالاك، روشه‌نبیر و رۆژنامه‌ڤانان ژ هه‌ر 4 پارچه‌یێ كوردستانێ و ده‌رڤه‌ى وه‌لات تێدا پشكداربوون. كۆنفرانس ب رێكا به‌رنامه‌یێ زووم ژ لایێ فه‌دراسیۆنا كومه‌له‌یێن كورد یا ناڤنه‌ته‌وه‌یی ڤه هاتبوو ئۆرگانیزه‌كرن و برێڤه برن. ژ باژیڕێ دهۆكێ رۆژنامه‌ڤان و كارمه‌ندێ گاڤ تیڤى (زێره‌ڤان عه‌لى) ژى پشكدار بوو.
د كۆنفرانسى دا كو مافێ ئاخفتنێ ب 17 كه‌سان كو پتریا وان سه‌رۆك و نوونه‌رێن حزبان و ئه‌كادیمیسیه‌ن و سه‌رۆكێن هنده‌ك كۆمه‌له‌یان بوون هاته دان.
مافێ ئاخفتنێ ل ده‌ستپێكێ ب ههڤسهرۆكا جڤاتا سووریا دیمۆكراتى (مه‌سه‌ده)یێ ئیلهام ئه‌حمه‌د هاته دان. ئیلهام ئه‌حمه‌دێ راگه‌هاند، كۆنگره‌یا قامشلۆ ل 26ى نیسانا بۆرى گاڤه‌كه گرنگبوو ژ بۆ رۆژئاڤایێ كوردستانێ، نها ب گرانى ئه‌و لسه‌ر سووریایا پاشه‌ۆژێ و چه‌سپاندنا مافێن كوردان د ده‌ستووهرا سووریێ دا د خه‌بتن. خواست ژى كۆنگره‌یه‌كه نه‌ته‌وه‌یی بۆ هه‌ر 4 پارچه‌یێن كوردستانێ بهێته سازكرن، گۆت ژى نابیت ده‌لیڤه‌یێن دیرۆكى بهێن ژ ده‌ستدان داكو نڤشێن پاشه‌رۆژێ وان ژى تۆمه‌تبار نه‌كه‌ن.
ژ ئالیێ خۆڤه سه‌رۆكێ ئه‌نجومه‌نا نیشتمیانى كورد – ئه‌نه‌كه‌سه یێ مه‌حموود ئیسماعیل ژى گۆت: نها ئه‌و لسه‌ر دو ئاستان كار دكه‌ن، سووریا نوى چه‌وا بیت و كورد چ دخوازن؟ گۆت ژى، ئه‌و دكارن ل شوینا شه‌ڕى ب زمانێ دیالۆگێ گه‌له‌ك مافێن كوردان ل رۆژئاڤایێ كوردستانێ مسۆگه‌ر بكه‌ن.
مه‌حموود ئیسماعیل، باس ل رۆلێ سه‌رۆك مه‌سعوود بارزانى ژى كر كو ب ده‌ستپێشخه‌رى و پشته‌ڤانیا وى كۆنگره‌یێ ئێكڕێزى و ئێكهه‌لوه‌ستیا كوردان ل رۆژئاڤایێ كوردستانێ هاته سازكرن و خواست ژى پشته‌ڤانیا سه‌رۆك بارزانى بۆ وان به‌رده‌وام بیت. دوپاتكر ژى، ئه‌و شه‌ڕێ پۆستان ل شامێ ناكه‌ن، به‌لكو شه‌ڕى بۆ مافێن كوردان دكه‌ن.
ئه‌ڤه و هژماره‌كا سه‌رۆك و نوینه‌رێن پارتیێن كوردان ل رۆژهه‌لات و باكورێ كوردستانێ و سه‌رۆكێن كۆمه‌له‌یێن كوردى و ئه‌كادیمیسیه‌نان دوپاتى ل گرنگییا هه‌ڤگرتنا ئالیێن كوردى و براتیا كورد و كوردان كر و دوپاتكرن گه‌ر كورد بكارن براتیێ ب ترك و عه‌ره‌ب و فارسان را بكه‌ن، بۆچى نه‌شێن براتیا خۆ ساز بكه‌ن.
ژ ئالیێ هژماره‌كا پشكداربوویان ڤه ره‌خنه‌یێن توند ژى ل پارتیێن كوردى و جڤاكا كوردى ب گشتى هاتنه گرتن.
یاشار عه‌بدولسه‌لام ئوغلۆ، مامۆستایێ زانكۆیا سۆفیا ل بلغاریا دیاركر، كورد 4 پارچه نینن، به‌لكو 400 پارچه‌نه و ژ روویێ سوسیۆلۆجى ڤه ده‌مێ نه‌ته‌وه‌یا كورد تێ خواندن، تنێ ده‌رمانه‌ك هه‌یه كورد ژ ڤێ پارچه‌بوونێ رزگارببن، ئه‌و ژى نه‌ته‌وه‌بوونه، ئه‌گه‌ر نه دونیا چه‌ند بهێته گوهه‌رتن كورد دێ پارچه‌كرى بمینن.
كۆنفرانس كو ژ ئالیێ فه‌دراسیۆنا كۆمه‌له‌ێن كورد یا ناڤنه‌ته‌وه‌یی و ئه‌ندامێ كۆمه‌له‌یێ (هه‌ژارێ شامل) دهاته برێڤه برن، هه‌ژارێ شامل پشتى 2 ده‌مژمێر و نیڤان كو ئه‌ڤرۆ ژ ده‌مژمێر 7ێ ئێڤارێ ده‌ستپێكر و تا ده‌مژمێر 9:30 به‌رده‌وام بوو، هاته ب دواوی ئینان.
