گاڤ

ئێکەم کاروانێ حەجییێن کوردستانێ ب رێکا فرۆکەیێ بەرەڤ سعوودیێ دا رێ. وەزیرێ ئەوقاف و کاروبارێن ئایینی راگەهاند؛ باشترین خۆمەتگۆزاری بۆ وان هاتینە بەرهەڤکرن.

ئێکەم کاروانێ حەجییێن کوردستانێ ب رێکا هەردو فرۆکەخانەیێن هەولێر و سلێمانییێ، بەرەڤ سعوودیێ دا رێ. ئەڤرۆ، ئێکشەمییێ، 2025-5-18، وەزیرێ ئەوقاف و کاروبارێن ئایینی کۆنگرەیەکێ رۆژنامەڤانی دا راگەهاند؛ باشترین خۆمەتگۆزاری وەک خوارن، هاتوچوو و جهێ مانێ بۆ وان هاتینە بەرهەڤکرن.

دیارکر ژی؛ داخوازێ چ حەجییان دکەین هەماهەنگی ل گەل کارگێرییا حەج و عومرەیێ هەبیت و ل گەل وان د هاریکاربن داکو ئەڤ سالە ب باشترین شێوە و باشتر ژ سالێن دی بهێتە برێڤەبرن.

گۆت ژی؛ پێنج ژ هزار کەس ژ هەرێما کوردستانێ نە و ئەڤێ ژی پێدڤی ب هەماهەنگییەکا باش هەیە.

رێڤەبەرێ گشتی یێ حەج و عومرەیێ دیارکر ژی؛ ئەڤ شەڤە ل فرۆکەخانەیا هەولێرێ 144 کەس دێ بەرەڤ سعوودیێ دەنە رێ پاشی ل دەمژمێر 9:30 شەڤ 144 کەسێن دی دێ دەنە رێ، سوبەهی دەمژمێر 01:00ـێ پشتی نیڤرۆ حەجییێن سلێمانییێ، کو هژمارا وان 144 کەسن ب رێکا فرۆکەخانەیا سلێمانییێ دێ دەنە رێ.

ل هەردو شەڤێن بۆری 16-17 گولانێ، حەجییێن دهۆک، زاخۆ، هەولێر، سلێمانی، هەلەبجە، سۆران، گەرمیان و راپەرین کو هژمارا وان گەهشتە 1636 کەسان، ب رێکا هشکاتی بەرەڤ سعوودیێ ب رێ کەفتن.

 پشکا هەرێما کوردستانێ بۆ ئەڤ سالە ل چاڤ سالا بۆری هاتییە زێدەکرن، سالا بۆری چار هزار و 174 کەس ناڤ دەرچوو بوون، لێ بۆ ئەڤ سالە کو ل 25-09-2024 تیروپشک بۆ هاتە کرن، پێنج هزار و 120 ناڤێن کەسان دەرچوون.