گاڤ

خودانێن كافێتریایێن ل سه‌ر رێكا بابلۆ – زاویته دژى بریاره‌كا كارگێرییا پارێزگه‌هێ نه‌ و دوباره‌ جهێن خۆ ڤه‌كرن. خودانێ ئێک ژ كافێتریایا راگەهاند؛ پترییا گەنجێن ل گەل وان کاردکەن دەرچوویێن زانکۆیانن.

خودانێن كافێتریایێن ل سه‌ر رێكا بابلۆ – زاویته دژى بریاره‌كا كارگێرییا پارێزگه‌هێ نه‌ و دوباره‌ جهێن خۆ ڤه‌كرن. ئەڤرۆ، سێشەمبییێ، 2025-5-20، خودانێ ئێک ژ كافێتریایا د کۆنگرەیەکێ رۆژنامەڤانی دا راگەهاند؛ 15 جهێن گۆزارینە و هەتا 90 خێزانان داهاتێ وان ل سەر ڤێرێ یە و پترییا گەنجێن ل گەل وان کاردکەن دەرچوویێن زانکۆیانن.

دیار کر ژی؛ هەتا 16 گەنجان بتنێ ل گەل وی کاردکەن، ئەگەر هات و ئەڤ جهە هاتنە دائێخستن دێ هەمی میننە ل مال.

سەبارەت قەرەبووکرنێ دیارکر ژی؛ وان جهەکێ پێگوهۆڕ بۆ جهێ خۆ دڤێت یان بهێلن کار بکەن، ئەو د بەرهەڤن ل دویڤ رێنمایێن حکومەتێ کاربکەن.

سەبارەت دانا باجەیێ دیار ژی کر؛ دڤان سالان دا وان چ باجە نەداینە حکومەتێ، لێ ئەگەر داخواز ژ وان بهێتە کرن ئەو د بەرهەڤن کرێیەکێ سالانە بدەنە ئالییێن پەیوەندیدار.

سەبارەت گرانییا بهایان گۆت ژی؛ ئەو د بەرهەڤن بهایێن خۆ ل دویڤ رێنمایێن ئالییێن پەیوەندیدار جێگر بکەن.

سەبارەت سۆزنامەیان گۆت ژی؛ وان سۆزنامە ل گەل ناحییێ دروستکرییە لێ ئەو وی دەمی دێ رابن ل دەمێ کار ل سەر دهێتە کرن و پێشوەخت بهێنە ئاگەهدارکرن.

ئاماژە ب هندێ ژی کر؛ ژ ئالییێ دارایی ڤە گەلەک زیان گەهشتییە وان و هەر نوکە ئەو دوبارە دێ دەست ب کارێ خۆ کەن.