گاڤ – تایبەت

ژبەر ئالۆزییێن یاریا دناڤبەرا دهۆک و تەلەبە دا، فدراسیۆنا تەپاپێ یا ئیراقێ راهێنەرێ یانەیا دهۆک سزادا بوو. رێڤه‌به‌رێ ئێمناهییا یانه‌یا دهۆک بۆ گاڤ راگەهاند؛ ئەو ب سێ ملیۆن دیناران هاتییە سزادان.

ژبەر ئالۆزییێن یاریا دناڤبەرا دهۆک و تەلەبە دا، فدراسیۆنا تەپاپێ یا ئیراقێ راهێنەرێ یانەیا دهۆک سزادا بوو. ئەڤرۆ، سێشەمبییێ، 2025-5-20، موقەدم سەگڤان زێوکی، رێڤه‌به‌رێ ئێمناهییا یانه‌یا دهۆک بۆ یاسر عەبدولرەحمان، پەیامنێرێ گاڤ راگەهاند؛ ئەو ب سێ ملیۆن دیناران هاتییە سزادان و تا دویماهییا وەرزی نابیت چ کاران بکەت.

دیار ژی کر؛ سکالا ژبەر چالاکییا یانەیا دهۆک ل سەر وی هاتییە تۆمارکرن کو چالاکییەک بۆ زارۆکێن نەخۆش رێکخست بوو، یانەیا دهۆک دەستویری ژ ئێکەتییا تەپاپێ یا ئیراقێ وەرگرتبوو.

گۆت ژی؛ سەرپەرشتێ یاریێ گۆتبوو وان ئەز ڤێ چالاکییێ برێڤە نابەم چونکی وی دەستویری وەرنەگرتییە لێ پشتی وان دویڤچوون کری دەستویری هاتبوو وەرگرتن، ب دلێ سەرپەرشتی نەبوو چالاکی بهێتە برێڤەبرن.

دیار ژی کر؛ پاراستنا گیانێ دەستەیا یانەیان و راهێنەر د ستۆیێ وان دا یە، ئەو ناکۆکییا دروستبوویی بتنێ دناڤبەرا وان هەردویان دا بوویە و پشتی یاری ب دویماهی هاتی هەمی تشت د نۆرمال بوون.

سەبارەت هێرشکرن ل سەر دادڤانان گۆت ژی؛ چ راستی بۆ ڤان دەنگویان نینە، بەروڤاژی پاراستنا گیانێ وان د ستۆیێ وان دایە.

سەبارەت سکالاکرنێ دیار ژی کر؛ ئەو ژی دشییا سکالایێ تۆماربکەت لێ وی نەخواست کار مەزنتر لێ بهێت، لێ ئالییێ دی راپۆرتا خۆ نڤیسی. ئەو ب سێ ملیۆن دیناران هاتییە سزادان و تا دویماهییا وەرزی نابیت بەرهەڤ ببیت و چ کاران بکەت.

ل 2025-5-15، یانەیا دهۆک چالاکییەک بۆ زارۆکێن نەخۆش رێکخستبوو و پشتەڤانان یاری هاڤێتنە د یاریگەهێ دا، پاشی یانەیا دهۆک، سەرەدانا نەخۆشخانەیا هیڤی یا زارۆکان کر و یاری ل سەر وان زارۆکێن هەلگرێن نەخۆشییان ب تایبەت یێن پەنجەشێرێ بەلاڤکرن.