گۆڤەند شێروانی – پسپۆرێ بیاڤێ پەترۆلێ و مامۆستایێ زانکۆیێ

هەردو رێککەفتنێن هەرێما کوردستانێ ل گەل هەردو کۆمپانییێن HKN و WesternZagros یێن بسپۆر د بیاڤێ گازا سرۆشتی دا، تایبەتن ب پێشڤەبرنا گازا سرۆشتی یا زەڤییێن هەرێما کوردستانێ، د سێ زەڤییێن گازێ دا ل هەرێما کوردستانێ دێ کار ل سەر پێشڤەبرنا گازا سرۆشتی کەن ژوان ژی میران، کوردەمیر و تۆپخانە. ب مەبەستا کێمییا بەرهەمئینانا گازا سرۆشتی و بۆ دانە کاری یا وەستگەهێن کارەبێ، نوکە حکومەتا هەرێما کوردستانێ تەکەزییێ ل سەر زێدەکرنا گازا سرۆشتی دکەت.

نوکە حکومەتا هەرێمێ 4500 مێگاواتێن کارەبێ بەرهەم دئینیت، ئەڤە د دەمەکی دایە پێدڤییا ناڤخۆ 8000 مێگاواتن. لەوما ب ڤێ چەندێ هەرێم دێ شێت خواستا وەستگەهێن بەرهەمئینانا کارەبێ پرکەت و دێ گەهیتە قویناغا پرکرنا پێدڤییا ناڤخۆ نەک بتنێ بۆ وەلاتییان بەلکو کەرتێ پیشەسازییێ ژی ب تایبەتی کارگەهێن چیمەنتۆیی و ئاسنی ب خۆ ڤە دگریت.

هەر چەندە ئەمریکا رۆلەکێ بەرچاڤ د دارێتنا ژێرخانەیا پیشەسازییا پەترۆلێ ل هەرێما کوردستانێ هەیە لێ کرنا ڤان رێککەفتنان نیشانا هندێ یە پەیوەندییا ئابۆری ب تایبەت کەرتێ پەترۆل و گازا سرۆشتی دێ پێشڤەچیت، لەوما ئەڤە گەلەک یا گرنگە.

ئەڤ هەردو رێککەفتنە تەمامکەرێن وان رێککەفتنانە یێن کو ل ئیراقێ دهێنە کرن، نوکە ل ئیراقێ کار ل سەر وەبەرهێنانا گازا سرۆشتی دهێتە کرن، مەبەستا وان ئەوە د ئەڤ سالە دا 70% یا گازا سرۆشتی ئەوا دهێتە سۆتن، ل شوینا بهێتە هەدەردان مفا ژێ بهێتە وەرگرتن. سالانە ب بهایێ سەدان ملیار دۆلار ب هەروەیی دچن و ئیراقێ ب خۆ ژی کورتهێنان د گازا سرۆشتی دا هەیە، لەوما گرێبەستەک ل گەل ئیرانێ ب بهایێ چار هەتا پێنج ملیار دۆلاران، رۆژانە پێنج ملیۆن مەترێن سێجا یێن گازا سرۆشتی بۆ ئیراقێ دهێنە هنارتن.

نوکە نێزیکی 650 ملیۆن پێ سێجا ژ گازا سرۆشتی دهێنە بەرهەمئینان ئەڤە د دەمەکی دایە و خواستا هەرێمێ پێدڤی ب 1000 ملیۆن پێ سێجا ژ گازا سرۆشتی هەیە. ئەگەر ئەڤە چێبوو کێشەیا کارەبێ نامینیت و دێ کارەبەکا زێدەتر بۆ کەرتێ پیشاسازی یێ هەرێمێ مینیت و رەنگە کارەب بۆ بەشێن دی یێن ئیراقێ ژی بهێتە هنارتن.

جهێ داخێ یە وەزارەتا پەترۆلێ یا ئیراقێ ئاماژە ب نەدەستووریا هەردو رێککەفتنێن هەرێمێ کرین و گۆتی بەروڤاژی بڕیارا دادگەها فیدرالی نە، پێدڤی بوو دویر ژ کارڤەدانێن سیاسەت و ئەجێندایێن حزبان ب ئالییەکێ تەکنیکی تەماشەیی هەردو رێککەفتنان کربا و دەستخۆشی و پشتەڤانییا خۆ بۆ هەرێما کوردستانێ دەربری با، چونکی چ کارتێکرن ل سەر بەشێن دی یێن ئیراقێ نینە بەروڤاژی گازەکا زێدەتر دێ هێتە بەرهەمئینان و دێ بۆ بەشێن دی هێتە رەوانەکرن ب تایبەتی وان پارێزگەهێن نێزیکن ژ سنۆرێ هەرێما کوردستانێ.

ئیراق ب گازا سرۆشتی وەلاتەکێ دەولەمەندە، و یەدەگێ وێ ب 127 ترلیۆن پێ سێجایان دهێتە تەخمینکرن و سەر ئاستێ جیهانێ، ئیراق بۆ یەدەگێ گازا سرۆشتی ل رێزا یازدێ یان دوازدێ دهێت. کڕینا گازا سرۆشتی و کارەبێ ژ وەلاتێن دەوروبەر وێ راستییێ نیشان ددەت کو ئیراق گەلەک پاشڤەمایە، ئەگەر ب شێوەیەکێ دروست سەرەدەری ل گەل ڤی کەرتی هاتبا کرن پێدڤی بوو ئیراقێ چ کێشەیێن کارەبێ نەمابان و هەتا گازا سرۆشتی بۆ وەلاتێن دی هنارتبا و داهاتێ وێ ب رێیا گازا سرۆشتی زێدە ببا و ئابۆرێ وێ پێشڤەچووبا.