گاڤ

راهێنەرێ یانەیا دهۆک د کۆنگرەیەکێ رۆژنامەڤانی یێ خاترخواستنێ دا راگەهاند؛ ریال مەدرید و بەرشەلۆنا ل خۆلا ئیراقێ یاریێ بکەن نابنە قارەمان، ئەز دێ ژ دهۆکێ چم.

مەسعوود میرال، راهێنەرێ یانەیا دهۆک د کۆنگرەیەکێ رۆژنامەڤانی یێ خاترخواستنێ دا ئەڤرۆ، سێشەمییێ، 2025-5-20، راگەهاند؛ فدراسیۆنا ئیراقێ گۆتە من؛ بێژە ئەز پەشیمانم، دێ سزایێ تە سڤک کەین، من گۆتێ هوین دز و سەختەچینە. ریال مەدرید و بەرشەلۆنا ل خۆلا ئیراقێ یاریێ بکەن نابنە قارەمان، ئەز دێ ژ دهۆکێ چم.

دیارکر ژی؛ نابێژم چ جاران نازڤرمە دهۆک و ئیراقێ لێ هەتا ئەڤ فدراسیۆنە ل ئیراقێ بمینیت، ئەز نازڤرم. دهۆک وەکی بحەشتێ یە، خەلکێ دهۆکێ گەلەک تشت پێشکێشی من کرن و من بڕیار یا دایی بەری ژ ئیراقێ بچم دێ سەرەدانا ئاکرێ و زاخۆ دەکەم.

گۆت ژی؛ ل دویماهییا ڤی وەرزی دێ گرێبەستا من ب دویماهی هێت لەوما دێ دەستان ژ کارکێشم، ئەز ژی مرۆڤم من ژی هەست یێن هەین، هەمی بزاڤان دکەم یاریکەرێن من باشتر بن، بۆ باشترکرنێ دێ ل سەر هەر تشتەکی شەڕی کەم.

ل هاڤینا بۆری مەسعوود میرالی، ئەرکێ راهێنەرایەتییا یانەیا دهۆک ب ستۆیێ خۆ ڤە گرت.

میرال د ئەڤ سالە دا شیا ناسناڤێ جاما کەنداڤی بدەستخۆڤە بینیت.

ل رۆژێن بۆری راهێنەرێ یانەیا دهۆک کۆنگرەیەکێ رۆژنامەڤانی گرێدابوو، ژ ئالییێ هندەک کەسان ڤە گۆتنێن وی هاتبوونە بڕین و ل تۆرێن خۆ یێن جڤاکی بەلاڤکربوون.

ئەڤ چەندە ژی بۆ ئەگەرێ هندێ چەندین نەرازیبوون ل جاددەیا ئیراقێ د دویڤخۆدا ئینان.

ل 19-5-2025، فدراسیۆنا تەپاپێ یا ئیراقێ راهێنه‌رێ یانه‌یا دهۆكێ مه‌سعوود میرال سزا دا و سزا ئەوبوو ئێدی نابیت راهێنانان ب یاریكه‌ران بكه‌ت، ب چ ره‌نگان ژى نابیت ب چیته‌ د ناڤا یاریگه‌هان دا و قه‌ده‌غه‌یه‌ هه‌مى چالاكیێن وه‌رزشى یێن گرێدایى ته‌پاپێ بكه‌ت.