گاڤ

ل بەغدا ب پشکدارییا رەوتا فوراتەین سەرۆکوەزیرێ ئیراقێ، شەش حزب، ئالی و هەڤپەیمانییان، هەڤپەیمانییەکا نوی بناڤێ " ئاڤەدانکرن و گەشەپێدان" ب مەبەستا پشکداریکرنا هەلبژارتنێن ئیراقێ یێن بهێت دا دانا.

ل بەغدا، ئەڤرۆ، چارشەمبییێ، 2025-5-21، ب پشکدارییا رەوتا فوراتەین محەمەد شیاع سوودانى، سەرۆکوەزیرێ ئیراقێ، شەش حزب، ئالی و هەڤپەیمانییان، ب مەبەستا پشکداریکرن د هەلبژارتنێن جڤاتا نوینەرێن ئیراقێ یێن بهێت دا هەڤپەیمانییەکا نوی بناڤێ " ئاڤەدانکرن  و گەشەپێدان" دانا.

بەیانا وان دیار ژی کر؛ حەفت حزب و هەڤپەیمانی پێکڤە چووینە بن سیبەرا ئێک هەڤپەیمانی و ئارمانجا وان ئاڤەدانکرن و گەشەپێدانا ئیراقێ یە.

بەیانا وان ئاماژە ب هندێ ژی دایە؛ هەر ئێک ژ حزب و هەڤپەیمانییێن رەوتا فوراتەین یا سوودانی، هەڤپەیمانییا گرێبەستا نشتیمانی یا فالح فەیاز، هەڤپەیمانییا نشتیمانی یا ئەیاد عەلاوی، هەڤپەیمانییا داهێنانا کەربەلا یا نەسیف جاسم پارێزگارێ کەربەلا، حزبا کۆمڤەبوونا وەلاتێ سۆمەری یا ئەحمەد ئەسەد وەزیرێ کاروبارێن جڤاکی، حزبا کۆمڤەبوونا نڤشان یا محەمەد سەهیود، هەڤپەیمانییا چارەسەرییا نشتیمانی یا محەمەد ساحب، ئەڤ هەڤپەیمانییە دروستکرییە.

خۆلا پێنجێ یا هەلبژارتنێن جڤاتا نوینەرێن ئیراقێ ل 10ـێ چریا ئێکێ یا سالا 2021 هاتبوو برێڤەبرن.

خۆلا شەشێ یا هەلبژارتنان ل دویڤ بڕیارا جڤاتا وەزیرێن ئیراقێ یا 9ـێ نیسانێ یا ئەڤ سالە، دێ ل 11ـێ چریا دویێ هێنە برێڤەبرن، دهێتە چاڤەرێکرن نێزیکی 30 ملیۆن ئیراقییان پشکدارببن.