گاڤ

کۆمسیۆنا سەربخۆ یا هەلبژارتنان یا ئیراقێ راگەهاند؛ ئەڤرۆ دویماهی ژڤانێ خۆ تۆمارکرنا د هەلبژارتنێن پەرلەمانێ ئیراقێ دا بوو. 118 حزبان داخوازکرییە پشکداری هەلبژارتنێن پەرلەمانێ ئیراقێ ببن.

کۆمسیۆنا سەربخۆ یا هەلبژارتنان یا ئیراقێ، ئەڤرۆ، پێنجشەمبییێ، 2025-5-22، راگەهاند؛ ئەڤرۆ دویماهی ژڤانێ خۆ تۆمارکرنا د هەلبژارتنێن جڤاتا نوینەرێن ئیراقێ دا بوو و 118 حزبان داخوازکرییە پشکداری هەلبژارتنێن پەرلەمانێ ئیراقێ ببن.

دیار ژی کر؛ دەستویری ب 343 ئالییان هاتەدان پشکداری هەلبژارتنان ببن و 16 لیستێن سەربخۆ خۆ تۆمارکریە.

گۆت ژی؛ 25 هەڤپەیمانییان داخوازکرییە پشکداری هەلبژارتنێن جڤاتا نوینەرێن ئیراقێ ببن.

خالد عەباس، بەرپرسێ نڤیسینگەها دهۆکێ یا کۆمسیۆنا بلند یا هەلبژارتنان، د دیدارەکێ دا بۆ گاڤ راگەهاندبوو: ژ دایکبوویێن هەردو سالێن 2006  و 2007کو ئێکەم جارە دێ پکداربن، کەسەکی وەغەرا دویماهییێ کربیت، پێدڤییە مالباتا وی بەلگەنامەیێن پێدڤی پێشکێشبکەت دا کو ناڤێ وی بهێتە رەشکرن، یان کەسەک مالا خۆ ژ جهەکی ڤەگوهێزیتە جهەکی و هندەک حالەتێن دی."

دیار ژی کربوو؛ " مە 41 بنگەھ هەنە، ل سەرانسەری پارێزگەها دهۆک، ئیدارەیا سەربەخۆ یا زاخۆ و هەمی قەزا و ناحیان هاتینە بەلاڤەکرن. هەروەسا پتری 100  تیمێن گەرۆک ژی هەنە، بۆ هەر کەسێ پێدڤی بیت داکو سەرەدانا مالا وی بکەن."

ئاماژە ب هندێ ژی دابوو؛ "ب دو مەرجان کەس دشێت پشکدارییێ د هەلبژرتنێن ئەڤ سالە دا بکەت، ئەوژی تۆمارا خۆ بایۆمەتری نوی بکەت و کارتا خۆ یا دەنگدانێ وەربگریت، نویکرنا تۆمارا بایۆمەتری دەرفەتە کو دەنگدەر بشێت پشکدارییێ د هەلبژارتنان دا بکەت."

سەبارەت هژماران وان کەسێن خۆ تۆمارکری دیار ژی کربوو؛ " پارێزگەها دهۆکێ ل سەر ئاستێ پارێزگەهێن ئیراقێ یا ئێکێ یە، ژ سەرجەمێ 944 هزار دەنگدەران، ب رێژەیا 81% خۆ تۆمارکرییە و پتری 760هزار کەسان کارتا خۆ یا دەنگدانێ وەرگرتی یە."

سەبارەت سەختەکارییێ دیار ژی کربوو؛ " ئەو ئامیرەیێن د دەنگدانێ دا دهێنە بکارئینان د گەلەک فلتەران دا دبۆرن، ئەو ئامیرە هاتینە هنارتن بۆ کۆریا داکو ئاپدەیتا وان بهێتە کرن و کامیرەک بۆ وان کەسان بهێتە زێدەکرن یێن کو ئاریشە د پەنجەمۆرێ دا هەیی داکو بشێت دەنگێ خۆ ب رێیا فەیس (ناڤجاڤێن خۆ) بدەت."

سەبارەت دوبارە بکارئینانا کارتا خۆ گۆتبوو ژی؛ " ب هیچ شێوەیەکێ کەس نەشێت ب کارتا کەسەکێ دی دەنگێ خۆ بدەت، ناڤێ خۆدانێ کارتێ ل ئێک وەستگەهـ هەیە."

سەبارەت هەژمارتنا دەنگان ژی دابوو دیارکرن؛ " نوینەرێن هەمی قەوارەیێ سیاسی ل هەمی وەستگەهان د بەرهەڤن و ئێکسەر پشتی ب دویماهیهاتنا دەنگدانێ، دێ دەست ب هەژمارتنا دەنگان هێتە کرن و ئەنجامێ وان دێ هێتە هنارتن بۆ بەغدا."

سەبارەت تۆمارکرنا ناڤێن ئاوارەیان دیار کربوو ژی؛ " ل گۆرەیی یاسا ژمارە 4 یا سالا 2023 یا هەموارکری، ماف ب وان ئاوارەیان هاتییە دان کو دەنگێ خۆ ل وان پارێزگەهان بدەت یێن کو ل وێ پارێزگەهێ روینشتین، پارێزگەها دهۆکێ مەزنترین رێژەیا ئاوەرەیان ب خۆ ڤە دگریت، مە تیمێت خۆ ل کەمپان بەلاڤکرینە و هەر کەمپەکێ دو تا سێ تیمان لێ هەنە."

سەبارەت ئاوارەیێن دەرڤەیی کەمپان دابوو دیارکرن ژی؛ " حەفت بنگەهـ و حەفت تیم بۆ ئاوارەیێن قەزا شنگالێ هاتینە دروستکرن و دێ دەنگێ خۆ ل دهۆکێ دەنە نوینەرێن خۆ یێن راستەقینە یێن پارێزگەها مویسل، لێ پێدڤییە خۆ تۆمارکربیت یان ب رێیا مە خۆ بنگەهێ بڤەگوهێزیتە دهۆکێ."

سەبارەت ئالییێن ئالییێن سیاسی راگەهاندبوو ژی بوو؛ " قویناغا حەزا پشکداریکرنێ هاتییە درێژکرن تا 20ـێ گولانێ، تا نوکە چار ئالییێن سیاسی ناڤێن خۆ تۆمارکرییە و ل رۆژا 25ـێ گولانێ دێ دەست ب وەرگرتنا ناڤێن بەربژاران هێتە کرن، چار کاندیدێن سەربەخۆ ناڤێ خۆ تۆمارکرییە، سێ ژوان بۆ کورسییێن گشتی و ئافرەتەکێ بۆ کورسییا (کۆتا)."

سەبارەت هژمارا کورسییان گۆتبوو ژی؛ " ل پارێزگەها  دهۆکێ 11 کورسی هەنە یێن کو دێ ئالییێن سیاسی هەڤرکییێ ل سەر کەن، پێدڤییە هەشت ژوان پێدڤییە زەلام بن، سێ ژوان ئافرەت و کورسییا کۆتا بۆ پێکهاتەیێ مەسیحی یە."

بریارە ل 2025-11-11  هەلبژارتنێن پەرلەمانێ ئیراقێ بهێنە برێڤەبرن و دهێتە چاڤەرێکرن نێزیکی 30  ملیۆن ئیراقییان مافێ دەنگدانێ هەبیت.