گاڤ

رێڤەبەرییا ناڤەندا فەلەکناسی یا ناڤدەولەتی ل ئیماراتێ راگەهاند؛ وەلاتێن جیهانا ئیسلامی ل رۆژا سێشەمبییێ، دکەڤیتە 27ـێ، دێ چاڤدێرییا هەیڤا نوی یا زولحیجە بۆ سالا 1446ـێ مشەختی هێتە کرن.

محەممەد شەوکەت عۆدە، رێڤەبەرێ ناڤەندا فەلەکناسی یا ناڤدەولەتی یا ئەبوزەبییا ئیماراتێ، ئەڤرۆ، ئێکشەمبییێ، 2025-5-25، د راپۆرتەکێ دا راگەهاند؛ وەلاتێن جیهانا ئیسلامی ل رۆژا سێشەمبییێ، دکەڤیتە 27ـێ گولانێ دێ چاڤدێرییا دیتنا هەیڤا نوی یا زولحیجە بۆ سالا 1446ـێ مشەختی هێتە کرن.

دیار ژی کر؛ دیتنا هەیڤێ د وان دو رۆژان دا، ب رێیا تلسکۆپێ ل ناڤەراست، رۆژئاڤایێ ئاسیا، ئەفریقیا و ئەورۆپا هەیڤ بهێتە دیتن، هەروەسا ب رێیا چاڤان پشکەکا بەرفرەهـ ل هەردو کیشوەرێن ئەمریکا هەیڤ بهێتە دیتن.

 ئەوژی دیارکرییە؛ دهێتە پێشبینیکرن رۆژا چارشەمبییێ، رۆژا ئێکێ یا هەیڤا زولحیجە بیت، ئەڤجا رۆژا ئەینییێ، 6ـێ خزیرانێ، ل پترییا وەلاتێن جیهانا ئیسلامی ئێکەم رۆژا جەژنا قوربانی بیت.

 سالانە ب ملیۆنان مۆسلمان ل سەرانسەری جیهانێ، ب مەبەستا کرنا فەریزەیا حەجێ قەستا سعوودییێ دکەن. پشکەک ژوان ژی قەستا مەدینێ باژێرێ پێغەمبەرێ ئیسلامێ، محەمەد مستەفا (سلاڤ لێ بن) دکەن.

ل 2025-5-18، رێڤەبەرێ گشتی یێ حەج و عومرەیێ راگەهاندبوو؛ ئەڤ شەڤە ل فرۆکەخانەیا هەولێرێ 144 کەس دێ بەرەڤ سعوودیێ دەنە رێ پاشی ل دەمژمێر 9:30 شەڤ 144 کەسێن دی دێ دەنە رێ، سوبەهی دەمژمێر 01:00ـێ پشتی نیڤرۆ حەجییێن سلێمانییێ، کو هژمارا وان 144 کەسن ب رێکا فرۆکەخانەیا سلێمانییێ دێ دەنە رێ.

ل هەردو شەڤێن 16-17 گولانێ، حەجییێن دهۆک، زاخۆ، هەولێر، سلێمانی، هەلەبجە، سۆران، گەرمیان و راپەرین کو هژمارا وان گەهشتە 1636 کەسان، ب رێکا هشکاتی بەرەڤ سعوودیێ ب رێ کەفتن.

 پشکا هەرێما کوردستانێ بۆ ئەڤ سالە ل چاڤ سالا بۆری هاتییە زێدەکرن، سالا بۆری چار هزار و 174 کەس ناڤ دەرچوو بوون، لێ بۆ ئەڤ سالە کو ل 25-09-2024 تیروپشک بۆ هاتە کرن، پێنج هزار و 120 ناڤێن کەسان دەرچوون.

ل 2025-5-21، دویماهی کاروانێ حەجییێن زاخۆ بەرەڤ سعوودیێ برێکەفتن. نوینەرێ رێڤەبەرێ گشتی یێ ئەوقافا زاخۆ بۆ پەیامنێرێ گاڤ راگەهاندبوو؛ سەرجەمێ حەجییێن سنۆرێ زاخۆ245  حەجینە، گرۆپێ ئێکێ ل حەفتییا بۆری ب پاسێ دایە ڕێ و نوکە ل مەدینێ یە و گرۆپێ دویێ دوهی سپێدێ دایە رێ و نوکە ل مەککەهێ یە.

دیارکربوو ژی؛ ئەڤە ژی گرۆپێ سێیێ یە و دویماهی گرۆپە ب مەرەما ئەداکرنا فەریزەیا حەجێ دێ بەرەڤ سعوودیێ دێ دەتە ڕێ و هژمارا وان دگەهیتە نێزیکی 150 حەجییان.

سەبارەت برێڤەبرنا کاروبارێن حەجییان دیار ژی کر؛ هەر44  حەجییان کەسەکێ ئایینی ل گەل دایە داکو، ژ زاخۆ دو کەسێن کارگێری و دو مامۆستایێن ئایینی ل گەل دایە، سەرباری خودانێن پێنج کۆمپانییان کو ب شێوەیەکێ ئێکسەر سەرپەرشتییا حەجییان دکەن.

ل 2025-5-19، ب بەرهەڤبوونا پارێزگارێ دهۆکێ ئێکەم گرۆپێ حەجییێن سنۆرێ پارێزگەها دهۆکێ برێکا فرۆکەخانەیا هەولێرێ دا ڕێ و هژمارا وان 145 کەس بوون.