گاڤ

سەرۆکێ دەستەیا دەروازەیێن سنۆری یا ئیراقێ راگەهاند؛ داهاتێ گومرکی د پێنج هەیڤێن دەستپێکێ یێن ئەڤ سالە دا ئێک تریلۆن دینار بۆراندینە. بتنێ د هەیڤا گولانێ دا، داهات 274 ملیار دینار بوون.

عومەر وائیلی، سەرۆکێ دەستەیا دەروازەیێن سنۆری یا ئیراقێ، ئەڤرۆ، چارشەمبییێ، 11-6-2025، راگەهاند؛ داهاتێ پێنج هەیڤێن دەستپێکێ یێن ئەڤ سالە دا ژ بەندەر، گومرک و رێڤەبەرییان ئێک تریلۆن دینار بۆراندینە.

دیارکر ژی؛ د هەیڤا گولانێ دا، داهاتێ دەروازەیێن سنۆری 274 ملیار دینار بوون.

گۆت ژی: سەرجەمێ داهاتێ پێنج هەیڤێن دەستپێکێ یێ سالا بۆری 700 ملیار دینار بوون، هەروەسا سەرجەمێ داهاتێ پێنج هەیڤێن دەستپێکێ بۆ سالا 2023ێ، نێزیکی 300 ملیار دیناران بوون، ئەڤجا ل چاڤ هەردو سالێن بۆری داهاتێ گومرکی زێدەبوویە.

ئاشکراکر ژی؛ گەهشتن ب ئێک ترلیۆن دیناران د پێنج هەیڤێن دەستپێکێ دا بۆ ئەڤ سالە، د چارچووڤەیێ وان پێرابوونێن کۆنترۆلکرنا دەروازە و کاراکرنا سیستەمێ حوکمرانی دا بوویە ئەوژی ل ژێر دەستهەلاتا گشتی یا گومرکی هاتینە بجهئینان.