گاڤ

دەستەیا دەروازەیێن سنۆری یا ئیراقێ راگەهاند؛ دویماهی زالگەها کوردستانێ ل سنۆرێ دیالا ب ناڤێ باوە مەحموود ب بارەگەهێ دەستەیا سەرەکی ڤە هاتە گرێدان و جوداهییا رەسم و بهایێ گومرکی نامینیت.

دەستەیا دەروازەیێن سنۆری یا ئیراقێ، ئەڤرۆ، چارشەمبییێ، 11-6-2025، د بەیانەکێ دا راگەهاند؛ ل گۆرەیی بڕیارا ژمارە 270 یا جڤاتا وەزیرێن ئیراقێ بۆ سالا 2025ێ، دویماهی زالگەها کوردستانێ ل سنۆرێ پارێزگەها دیالا ب ناڤێ باوە مەحموود ب بارەگەهێ دەستەیا سەرەکی یا ئیراقێ ڤە هاتە گرێدان.

دیارکر ژی؛ ئەڤ کارە بۆ دویڤچوون و پشتراستبوونا دادپەوەرییا کۆمکرنا داهاتی هاتییە کرن و ب ڤێ چەندێ جوداهییا رەسم و بهایێ گومرکی ل دەروازەیێن سنۆری یێن جودا-جودا نامینیت.

ل 1-6-2025، دەستەیا گومرکا ئیراقێ نڤیسارەک بۆ هەمی رێڤەبەرییێن گومرکی ل ئیراقێ و کوردستانێ هنارتبوو و راگەهاندبوو؛ بڕێ گومرکی ل سەر کەلوپەل و ئەو ترومبێلێن ژ دەرڤە هاتینە ناڤخۆ هاتە هەلوەشاندن. بەری نوکە بڕێ وێ ژ 1% دەستپێدکر لێ نوکە هاتە گوهۆرین، ژ 10% دەستپێدکەت هەتا دگەهیتە 30%، ئەڤ گاڤە ژی بۆ ئێکگرتن و وەکئێکییا رەسمێ گومرکییە ل هەمی ئیراقێ و هەرێما کوردستانێ.