گاڤ

پشتی دروستبوونا ئالۆزییان ل رۆژهەلاتا ناڤین بهایێ پترۆل و زێڕی ب رەنگەکێ بەرچاڤ بلند بوون و بهایێ دیناری ژی هەمبەری دۆلارێ ئەمریکی هاتە خوار.

پشتی دروستبوونا ئالۆزییان ل رۆژهەلاتا ناڤین دناڤبەرا ئیران، ئسرائیل و ئەمریکا دا، بهایێ پترۆل و زێڕی ب رەنگەکێ بەرچاڤ بلند بوون، بهایێ ئێک بەرمیلا پترۆلا خاڤ یا برێنت د بۆرسەیا جیهانێ دا گەهشتە 68 دۆلار و 71 سەنتان، هەڤدەم دوهی، ب 66 دۆلار و 79 سەنتان مامەلە پێ دهاتە کرن.

هەروەسان بهایێ ئێک بەرمیلا پترۆلا تەکساس د بۆرسەیا جیهانێ دا گەهشتە 67 دۆلاران، لێ ل دوهی ب 65 دۆلاران مامەلە پێ دهاتە کرن.

دیسان بهایێ ئێک ئۆنسەیا زێڕی ژ سێ هزار و 347 دۆلاران گەهشتە سێ هزار و 387 دۆلاران.

هەروەسا ئەڤرۆ، بهایێ دۆلارێ ئەمریکی د بازارێ دهۆکێ دا، هەر ئێک دۆلار هەمبەری 1440 دیناران بوو.

ئەڤە د دەمەکی دایە، دۆنالد ترەمپ، سەرۆکێ ئەمریکا، چارشەمبییێ، 11-6-2025، د دیدارەکێ دا راگەهاند؛ د راستی دا ئەز هزردکەم تەهران د چارچووڤەیێ وێ رێککەفتنا واشنتون ل گەل وان هەیی سەبارەت راگرتنا پیتاندنا یۆرانیۆمی رازی نابیت لەوما باوەرییا من کێم بوویە.

هەڤدەم، عەزیز نەسیرزادە، وەزیرێ بەرگرییێ یێ ئیرانێ، چارشەمبییێ، 11-6-2025، راگەهاند؛ ئەگەر دانوستاندنێن ئەتۆمی ل گەل ئەمریکا سەرنەگرن و ئیران بچیتە د ناڤ ململانێیا سەربازی دا، دێ ب تەمامی بنگەهێن سەربازی ل دەڤەرێ کەینە ئارمانج.

هەروەسان، ئاژانسا رویتەرز ژ زارێ بەرپرسێن ئەمنی یێن ئیراقێ، چارشەمبییێ، 11-6-2025، راگەهاند؛ ژ ئەگەرێ زێدەبوونا مەترسییێن ئەمنی، واشنتون بەرهەڤییان دکەت بالیۆزخانەیا وەلاتێ خۆ ل بەغدا چۆل بکەت.

هەروەسان، ئاژانسا ئەسۆشیەیتد پرێس راگەهاندبوو؛ ژ ئەگەرێ نەئارامییێن دەڤەرێ، دێ واشنتون کارمەندێن خۆ یێن نەسەرەکی ل بالیۆزخانەیا بەغدا ڤەکێشیت.

دیسان، ژێدەرەکێ دی ژ وەزارەتا بەرگرییا ئەمریکا (پنتاگۆن) بۆ ئاژانسا ناڤبری دیارکربوو؛ واشنتون ب تەمامی پشتەڤانییا خۆڤەکێشانا ستافێ بالیۆزخانەیا خۆ ل بەغدا دکەت.

ئاشکراکربوو ژی؛  واشنتونێ فەرمان ب هەردو بالیۆزخانەیێن خۆ ل کوێت و بەحرینێ کرییە کو ستافێ نەپێدڤی کێم بکەن و ئەگەر وان وەلاتان بجهبـهێلن ژی چ کێشە نابن.

هەڤدەم، ژێدەرەک ژ حکومەتا ئیراقێ ل دۆر چۆلکرنا بالیۆزخانەیا ئەمریکا ل بەغدا، چارشەمبییێ، 11-6-2025، بۆ میدیایێن ئیراقی راگەهاندبوو؛ ئالییێ ئیراقێ چ ئاماژەیێن ئەمنی تۆمارکرنەکرینە کو پێدڤی بیت بالیۆزخانەیا ئەمریکا بهێتە چۆلکرن.

دیارکربوو ژی؛ ئەڤ گاڤە گرێدایە ب وان پێرابوونان ڤە یێن تایبەت ب هەبوونا ئەمریکا ڤە ل دەڤەرێ.

گۆتبوو ژی: هەمی هنارتییێن دیپلۆماسی یێن عەرەبی و بیانی یێن ل ئیراقێ، د سەقایەکێ ئارام دا کاردکەن و ب باشترین شێوە پێدڤییاتی بۆ وان هاتینە دابینکرن.

ئاشکراکربوو ژی؛ هەمی ئاماژەیێن ئەمنی پشتەڤانن بۆ باشتربوونا ئاستێ سەقامگیری و ئاسایشا ناڤخۆ یا ئیراقێ.