ئاخفتنەكا بەربەڵاڤ دناڤ جڤاکێ مە دا هەیە، دبێژیت: "یێ چوو، چوو". ئەڤە هینگێ دهێتە گۆتن دەما کەسەك وەغەرا داویێ دکەت. لێ ساڵێن تەمەنی، ئەزموونێن ژیانێ، هەلکەفتێن جودا و هەلویستێن مرۆڤان تشتەکێ دی نیشا مە ددەن. دبێژنە مە ئەڤ ئاخفتنە هەردەم و بۆ هەمی کەسان دروست نینە. هەڵبەت گەلەك نموونە هەنە ئەم ڤەگێرین بۆ سەلماندنا ڤێ چەندێ. لێ ئەم دێ تنێ بەحسا وەغەرا داویێ یا شەهید (‌غازی ئالیخان) کەین کو بەری دوو ساڵان و د رۆژەکا وەکی ئەڤرۆدا هاتە شەهیدکرن و ئێدی وەك جەستە دناڤ مە دا نەمایە. لێ ب هەمی رەنگێن دی دگەل مە پشکدارە و وەکی بەرێ یێ چست، چەلەنگ و ب جۆشە.
دوماهی پشکدارییا ویژی بەری چەند رۆژان بوو دهەلبژارتنا کاندیدێن پارتی دیمۆکراتی کوردستاندا بۆ کۆنگرەیێ چاردێ. ئەم دشێین بێژین شەهیدی ژ هەر هەڤال، خزم و ئەندامەکێ مالباتێ پتر دەنگ بۆ دۆتماما خوە (گولستان ئالیخان)ێ کۆمکرن. هەروەسا سەدەمەکێ سەرەکیێ سەرکەفتنا وێ بوو ب رێژەیەکا مەزنا دەنگان. هەر چەندە وێ درەنگ خوە کاندید کربوو و هەڤڕکێن وێژی بهێزترینێن دەڤەرێ بوون. ئەڤ ئەزموونێن هۆسا دیاردکەن کو نە ئاخ و نە چ تشت نەشێن مرۆڤێن خودان کار و هەلویست بەرزەکەن و ئاخفتنا "یێ چوو، چوو" تنێ بۆ وان کەسان دروستە کو دژیانێدا بێ کار و کریار، بێ ئارمانج، بێ هیڤی، بێ بزاڤ و خەباتن. لێ کەسێن وەك شەهیدی دێ هەر و هەر مینن و قەت ناچن.