هه‌رمان سالح

چ گۆمان تێدا نینە کو ھەر گوھۆڕینەکا ل ھەرەمێ برێڤەبرنێ پەیدا دبیت د ھەر بەش و لایەکی دا بیت، کارتێکرنا خۆ ل سەر بیاڤێن جڤاکی، سیاسی و دارایی و ئابووری یێ ھەر وەلاتەکێ دکەت ب تایبەتی ل وەلاتێن پاشکەفتی یان وەلاتێن د قووناغێن پێشکەفتنێ دا کو ژ وان ژی ئەم وەک دەولەتێن رۆژھەلاتا ناڤین ب ڤی سالوخەتی  بەرنیاسین کو ھەر گوھۆڕینەکا پەیدا ببیت ئاراسته‌يێن کاری و برێڤەبرنێ ب 180 پله‌يان دگوھۆڕیت و گوھۆڕینێن ریشەیى و كوير پەیدا دبن، ھەر چەندە ئەڤ کارتێکرنە ل دەولەتێن پێشکەفتی ژی ھەیە بەلێ کارتێکرنەکا لاوازە نەک گه‌له‌ك يا زەق و دیارە وەک ل وەلاتێن وەک عیراقێ ب گشتی و ھەرێما کوردستانێ ب تایبەتی هه‌ى.

ژبەر ڤێ چەندێ، دھێتە پێشبینیکرن کو ھەر گوھۆڕینەکا ل کۆنگره‌يێ PDK پەیدا دبیت ب تایبەتی ل ھەرەمێ سەرکردایەتیا پارتی، کارتێکرنێن خو یێن راستەراست و ئێکسەر بکەتە سەر پتریا بوارێن برێڤەبرنا هه‌رێمێ ژ وان ژی لایەنێ دارایی و ئابووریێ دەولەتێ یە کو ئێک ژ گرنگترین بوارێن و لایەنێ ھەری دیارە د پێستركا برێڤەبرنێ دا.

بۆچى ئەم دبێژین کو پێشبینیا گوھۆڕینان و کارتێکرنێ لسەر لایەنێن دارایی و ئابوورى يێن هه‌رێمێ هه‌يه‌؟

1. چونکی ئەو کەسێن پترترین دەستھەلات و رێڤەبەرى ھەی د ھەمی ئاستێن رێڤەبەریێ و ب تایبەتی ل ئاستێن دارایی و ئابووری یێن دەولەتێ دا خەلکێن PDK نه‌  ژبەر ڤێ چەندێ ژی د شیان دایە ب گوھۆڕینێن پەیدا دبن د دەستەیا کارگێری و سەرکردایەتیا پارتی دا کو ئارمانج ژێ بەرەڤ پێشچوون و نویکرنا گیانێ پارتیە ھەمان گوھۆڕین پەیدا ببیت د کەرتێن دارایی و ئابووری یێن وەلاتی دا.

2. ژ بەر کو ھەر بزاڤەک و چالاکییەک و رێکارەکا بھێتە ئەنجامدان د ئاستێ دارایی و ئابووری دا ژ لایێ شیرەتکار و خەملێنەرێن دارایی دھێتە ئاراستەکرن کو ب مخابنیڤە د ئاستەکێ لاواز دانە و  زیانێن گەلەک مەزن ب کەرتێ دارایی و ئابوورى يێ وەلاتی گەھاندییە کو پێشبینیکریە گوھۆڕین پەیدا ببن ژ دەرئەنجامێ کارڤەدانا وان گوھۆڕینێن ل کۆنگرەی پەیدا دبن.

3. ژبەر کو پتریا ئەو گەندەلیا دھێتە کرن و قەباره‌يێ وێ مەزن دبیت ڤەدگەڕیتەڤە بۆ رێڤەبەریێن بچویک، ده‌رئه‌نجامێ کۆما ڤان گەندەلیێن رێڤەبەریێن بچویک دبنە قەباره‌يێن مەزن و زیانێن مه‌زن ژ بۆ سەر بارێ دارایی و ئابووریێ دەولەتێ دگه‌هينن.

4. زێدەبارێ ھندێ د ڤی کۆنگره‌يی دا وەک سۆز بۆ ھاتیە دان کو گرنگیەکا زێدەتر ب تەخا گەنجان بھێتە دان زێدەباری ھندێ گەنج و کادرێن خودان بروانامە کو گەله‌ک ژ وان دێ د ھاریکارن بن بۆ خەملاندێن باش و دویرکەفتن ژ گەندەلیێن زەق و دیار، ژ دەرئەنجامێ دەرچوونا ڤێ تەخا گەنجان و خودان شارەزایی و پسپۆریێن ژ ھەژی کو دھێنە بەرھەڤکرن و پتر دەلیڤه‌يێن وەرگرتنا پۆستێن کارگێری یێن ڤان رێڤەبەریێن بچويک ھەنە کو د مفادار بن ب رەنگەکێ ئەرێنی بۆ سەر کەرتێ دارایی و ئابووری یێ دەولەتێ.

5. زێدەباری زیانپێگەھاندنەکا مەزن ب PDK و ئەڤا رویداى د ھەلبژارتنێن جڤاتا نوینەرێن ئیراقێ دا کو دەنگێن پارتی ل بانکێن پارتی بەر ب لاوازی و کێمبوونێ ڤە چوو بوون، لەوما پارتی ھەمی بزاڤ و لێكۆلين ئەنجامداينە ژ بۆ ڤەدیتنا ڤان ئەگەران، کو ئێک ژ وان ئەگەران کو کارتێکرنەکا مه‌زن ژی کریە سەر بارودۆخێ دارایی و ئابووری یێ وەلاتی بریتیە ژ گەندەلیا دارایی و ئابووری ئەوا ژ لایێ ڤان رێڤەبەریێن بچویک ڤە هەتا رێڤەبەریێن مەزن ژی ب خۆڤە دگریت دھێتە ئەنجامدان، ژ بھەدەردانا پارەيه‌کێ گەلەک يێ مەزن بێ خزمەتەکا مەزن بھێتە کرن بۆ نموونە ئەگەر ئەم کارگێریەکا سەربخۆ یا وەک زاخۆ بۆ نموونە وەربگرین، خۆدانا داھاتێن گەلەک مەزن و خزمەتێن بچویک و نە د شایستە بۆ ڤێ دەڤەرێ يه‌.

لەوما PDK ھەمی بزاڤێن ڤەگەڕاندنا وێ باوەری و سەنگا پارتى ل ڤێ دەڤەرێ دكەت، ژبەر ڤێ یەکێ چ گۆمانەک نینن کو دێ ئەڤ خواستە بدەستکەڤیت ئەگەر ب دروستى ئەڤ ئیرادە و خواستە ھەبیت، گۆمان ژی تێدا نینە هه‌تا نوکە وەک چاڤدێری و پێشبینیا دهێتە کرن، بگرە ژ درويشمێن کۆنگرەی و ھەلبژێرێن کۆنگرەی، ب رەنگەکێ رێژەيی ئامار و ئاماژه‌يێن د دلخۆشکەر و ئەرێنی نە.