قوباد تاله‌بانى: پارتى وه‌كو پشكداربووى نه وه‌ك هه‌ڤپشك سه‌ره‌ده‌ریێ دگه‌ل مه دكه‌ت
بەلاڤ بکە
گاڤ نیوز
جێگرێ سه‌رۆكێ حكومه‌تا هه‌رێما كوردستانێ كو كۆمبوونێێن حكومه‌تێ بایكۆت كرینه راگه‌هاند، ئێدى ئه‌و ڤه‌ناگه‌ڕنه ره‌وشا جاران و پشكداریكرنا د كۆمبوونێن حكومه‌تێ دا تا كێشه‌یێن وان چاره نه‌بن.
ماویه‌كه جێگرێ سه‌رۆكێ حكومه‌تا هه‌رێما كوردستانێ ژ ده‌رڤه‌ى جڤاتا وه‌زیرێن هه‌رێما كوردستانێ دیداران دكه‌ت و پێشه‌وازیێ ل شاند و مێهڤانێن خۆ دكه‌ت هه‌روه‌سا پشكداریێ د كۆمبوونێن جڤاتا وه‌زیران دا ناكه‌ت.
ئه‌ڤرۆ قوباد تاله‌بانى ل باژێرێ هه‌ولێرێ، د دیداره‌كێ دا دگه‌ل هژماره‌كا كونسۆل و نوینه‌رێن وه‌لاتان، باس ل كێشه‌یێن ئێكه‌تی نیشتیمانى كوردستان كر دناڤا حكومه‌تا هه‌رێمێ دا و راگه‌هاند، ب ڤى ده‌ستودارى ئێدى ئه‌و ڤه‌ناگه‌ڕنه ناڤا حكومه‌تێ.
تاله‌بانى ب ئاماده‌بویان راگه‌هاندى یه، ئێكه‌تى نه هه‌ڤپشكه د حكومه‌تێ دا و پارتى ل شوینا هه‌ڤپشكیێ وه‌كى پشكداربووى سه‌ره‌ده‌ریێ دگه‌ل ئێكه‌تیێ دكه‌ت.گۆت ژى، ئێكه‌تى ڤێ ره‌وشێ قه‌بوول ناكه‌ت و تا وه‌كو هه‌ڤپشكه‌كا حه‌قیقى سه‌ره‌ده‌رى دگه‌ل نه‌هێته كرن ئه‌و ڤه‌ناگه‌رنه ناڤا كۆمبوونێن حكومه‌تێ.
جێگرێ سه‌رۆكێ حكومه‌تێ، قوباد تاله‌بانى ئاماژ ب دوئیداره‌كرنا هه‌رێمێ ژى دا و گۆت، نها ره‌وشا ده‌ڤه‌را( كۆیه) دناڤبه‌را پارتى و ئێكه‌تى دا وه‌كى ناوچه‌یێن 140 یێن ژێر كونترۆلا ئیراقێ یه.
