"تويته‌رى ب مليۆنان بكارهينه‌رێن خۆ ژده‌ستداينه"
بەلاڤ بکە
گاڤ نيوز
پشتى ئيلۆن ماسك ب فه‌رمى بوويه خۆدانێ تۆرا تويته‌رى، ب مليۆنان بكارهينه‌رێن تويته‌رى ئه‌كاونتێن خۆ ديلێت كرينه يان راگرتينه و ئه‌پليكه‌يشنێ Mastodon بوويه ئێك ژ پێگوهۆڕێن تويته‌رى بۆ گه‌له‌ك كه‌سان.
مالپه‌رێن ته‌كنولوژيايێ به‌لاڤكرينه؛ پشتى ئيلۆن ماسك هه‌ڤبه‌ستا كڕينا تويته‌رى ته‌مامكرى و بوويه خۆدانێ وێ و سه‌رۆكێ بجهئينانێ يێ وێ، ژ به‌ر ژماره‌يه‌كا ره‌فتارێن وه‌كى ژكارلادانا ب هزاران فه‌رمانبه‌ران، زێده‌بوونا گۆتارا نه‌ڤيانێ د تۆرێ دا و پلانا پشكداريێن ب پاره بۆ ئه‌كاونتێن نيشانا شين هه‌ين، تۆرێ ب مليۆنان بكارهينه‌ر ژده‌ستداينه.
ديار ژى كرينه؛ ب تنێ د شه‌ش رۆژێن ژ 27ى ئوكتۆبه‌را بۆرى تا 1ى ڤێ هه‌يڤێ، تويته‌رى 1.3 مليۆن بكارهينه‌رێن خۆ ژده‌ستداينه.
گه‌له‌ك ئه‌پليكه‌يشنێن دى وه‌ك پێگوهۆڕێن تويته‌رى چالاك بووينه و ئه‌پليكه‌يشنێ Mastodon يێ ئه‌لمانى ئێك ژ وانه.
يوجن رۆشكۆ دامه‌زرينه‌رێ Mastodon دياركر؛ ب تنێ ژ 27ى ئوكتۆبه‌رێ تا نوكه پتر ژ 489 بكارهينه‌رێن نوى ل تۆرێ زێده‌بووينه.
Mastodon تۆره‌كا جڤاكى يه و تا رادده‌يه‌كێ مه‌زن هه‌ڤشێوه‌يێ تويته‌رى يه و گه‌له‌ك ژ ساخله‌تێن د تويته‌رى دا هه‌ين، تێدا هه‌نه.
ئيلۆن ماسك ملياردێرێ ئه‌مريكى ل 27ى چريا ئێكێ يا بۆرى پشتى چه‌ندين هه‌يڤان ژ بگروڤه‌كێشێ، هه‌ڤبه‌ستا كڕينا تويته‌رى ب بهايێ 44 مليار دولاران ته‌مامكربوو.
هه‌ر ژ ده‌مێ ماسكى هه‌ڤبه‌ستا كڕينا تويته‌رى ته‌مامكرى، وى ژماره‌يه‌كا مه‌زن يا به‌رپرسيێن تۆرێ زێده‌بارى 3700 فه‌رمانبه‌ران ژ كارى لاداينه.
