نڤیسین - سێمێلیەک
فەوزى محەمەد گیادین، ل نک بامەرنیا بامەرنیە و ل نک مە خەلکێ سێمێلێ سێمێلیە. جارا ئێکێ من کەکێ فەوزى دیتى و ناسکرى ل مالا وان ب خوە بوو کو هینگێ ئەو و دایک و برا و هەڤژینا خوە د خانییەکێ (موجەمەعى) ڤە بوون ل سەرێ سێمێلێ. هەر ئەوێ رۆژێ من گەلەک حەز ژ وى و حەز ژ خێزانا وی یا هێمن و رووخوەش کر. دگەل روونشتنا ئێکێ، وى ب دایک و خێزان ڤە ئەو هەست بۆ مە چێکر هەروەکو ئەم یێن ل مالا خوە و دناڤا خێزانا خوە دە. فەوزیێ کورد پەروەر، فەوزیێ شاعر و خودان دۆز ب رەوشتێ خوە یێ بلند و هێمن و ب پاقژییا خوە، جهێ خوە د دلێ خەلکێ ئەوێ دەڤەرێ دە کر بوو. مالا وى، ل بیرا منە وەکو نیمچە بارەگایەکێ بچووک بوو کو گەلەک جاران ب گەرمى گەنگەشەیێن سیاسى تێڤە دهاتنە کرن و سەنتەرەکێ بچووکێ رەوشەنبیرى ژى بوو کو هەلبەست و چیرۆک تێڤە دهاتنە خواندن و بەحسکرن و نڤێسین و رەخنەکرن. ئەڤ چەندە نە تنێ ل دەمێ پاش سەرهلدانێ و هرڤە دهاتە کرن، لێ ل سەر دەمێ رژێمێ ژى فەوزى ب مال و خێزان ڤە هەر ئەو فەوزیێ تژى کوردینى بوو لەورا ژى دهێتە گرتن و پاشى ل زندانێن ئەبۆ غرێب ل بەغدایێ ل سەر دۆزا گەلێ خوە دهێنە حوکمرن.
فەوزى گیادینێ شاعر ژى هەر ژ ئەوان هێژایان بوو یێن کو رۆل د ڤەلڤاندنا بزاڤا رەوشەنبیرى دە هەین ل سێمێلێ و دەوروبەرا کو ب سایا وێ لڤینا وان یا ئەوى دەمى چەندین شاعر و چیرۆکنڤیس و رۆمانڤیس ل ئەوێ دەڤەرێ پەیدابوون و هندەک ژ وان تا ئەڤرۆ ژى هێژ بەرەوامن.
ل داوییێ دێ بێژم، گەلەک جاران دئێتە گۆتن: هێژ زوو بوو بۆ فلان کەسى کو باربکت و وەغەرا داویێ بکت، لێ راستیا هەرە تەحل ئەوە کو مرن چو زوو و درەنگا نوزانت و قەت خوەشمرۆڤ و چەوت و چەپەلا ژ ئێک جوداناکت، گەر هات، بێی دەرى قوتان، بێی سلاڤ دێ هێت و یێ بڤیت دێ بت و چت، و فەوزى هێژا ژى وەسا بر و بر. تشتێ مە پێ چێدبت دێ بێژین کەکو، مامۆستایێ هێژا، کورد پەروەرێ پاقژ و بێدەنگ وەغەرا تە یا خێرێ بت و تو ل ڕێ و ئەم ل پێ.