كۆمپانيا تێسلا پتر ژ 321 هزار ترۆمبێلان ژ بازاران ڤه‌كێشان

بەلاڤ بکە

گاڤ نيوز

كۆمپانيا تێسلا يا ترۆمبێلان پتر ژ 321 هزار ترۆمبێل ل ويلايه‌تێن ئێكگرتى يێن ئه‌مريكى ژ به‌ر كێشه‌يه‌كا ته‌كنيكى ژ بازاران ڤه‌كێشان.
ئاژانسان ژ كۆمپانيا تێسلا يا ئيلۆن ماسك ملياردێرێ ئه‌مريكى ڤه‌گوهاستينه‌؛ ژ به‌ر كارنه‌كرنا لايتێن پشتا ترۆمبێلێ هنده‌ك جاران، كۆمپانيێ بڕيارا ڤه‌كێشانا 321 هزار ترۆمبێلان ل ئه‌مريكا ژ بازاران ژ بۆ چاككرنا ڤێ شاشيێ دا.
كۆمپانيێ ديار ژى كر كو وان كارگێريا نيشتيمانى يا سلامه‌تيا هاتنوچوونێ ل سه‌ر رێكێن ب له‌ز ل ئه‌مريكا ئاگه‌هدار كريه‌ كو شاشيا لايتێن پشتێ د هنده‌ك ترۆمبێلێن مودێل 3 يێن سالا 2023 و مودێل واى يێن سالا 2020 دا هاتينه‌ ديتن.
ئه‌ڤ چه‌نده‌ ل ده‌مه‌كێ يه‌ كو ل رۆژا ئه‌ينيێ ژى كۆمپانيا تێسلا نزيكى 30 هزار ترۆمبێلێن مودێل X ژ به‌ر كارنه‌كرنا په‌ره‌شۆتا نه‌فه‌رێ سينگى ب ئاوايه‌كێ دروست ژ بازاران ڤه‌كێشابوو و ئه‌ڤ چه‌نده‌ ببوو ئه‌گه‌رێ كێمبوونا بهايێ پشكێن كۆمپانيێ ب نزيكى 3% و ب ڤێ چه‌ندێ بهايێ پشكێن وێ گه‌هشته‌ نزمترين ئاستێ خۆ د دو سالان دا.