ماسك هزر د ڤهگهڕاندنا ب هزاران ئهكاونتێن تويتهرى يێن راگرتى دا دكهت
گاڤ
پشتى ڤهگهڕاندنا ئهكاونتێ دونالد ترامپ سهرۆكێ بهرێ يێ ئهمريكا، ئيلۆن ماسك خۆدانێ نوى يێ تۆرا تويتهرى هزر د ڤهگهڕاندنا ئهكاونتێن ب هزاران كهسێن دى دكهت.
ئاژانسان بهلاڤكرينه؛ ئيلۆن ماسك راوهرگرتنهكا نوى ل سهر تويتهرى بهلاڤكريه كو رهنگه ببيته ئهگهرێ زڤڕاندنا ب هزاران ئهكاونتان بۆ تۆرا تويتهرى.
ماسك د راوهرگرتنا خۆ دا ژ بكارهينهرێن تويتهرى پرسيه "ئهرێ تويتهر لێبۆرينهكا گشتى بدهته ئهكاونتێن راگرتى ب وى مهرجى سهرپێچيا ياسايان و رێسايێن تويتهرى نهكهن؟".
د حهفتيا بۆرى دا، پشتى راوهرگرتنهكێ ل سهر تۆرا تويتهرى، كۆمپانيێ بڕيارا ڤهگهڕاندنا ئهكاونتێ دۆنالد ترامپ دابوو كو پشتى هێرشا لايهنگرێن وى ل 6ى كانوينا دوێ يا سالا 2021 ل سهر ئاڤاهيێ كاپيتۆل ’جڤاتا نوينهرێن ئهمريكا’ پشتى دۆراندنا وى د ههلبژارتنان دا ئهكاونتێ وى هاتبوو راگرتن.
ئيلۆن ماسك ل 27ى چريا ئێكێ يا بۆرى پشتى چهندين ههيڤان ژ بگروڤهكێشێ ههڤبهستا كڕينا تۆرا تويتهرى ب بهايێ 44 مليار دولاران تهمامكربوو و ببوو خۆدانێ نوى و سهرۆكێ بجهئينانێ يێ كۆمپانيا تويتهرى.
ههر ژ دهمێ ئيلۆن ماسك تۆرا تويتهرى كڕى، وى ژمارهيهكا بهرپرسێن تۆرێ زێدهبارى 50% يا فهرمانبهرێن كۆمپانيێ ژ كارى لاداينه.