راگه‌هاندنه‌ك ژ سه‌رۆكاتيا هه‌رێما كوردستانێ

بەلاڤ بکە

گاڤ

سه‌رۆكاتيا هه‌رێما كوردستانێ راگه‌هاندنه‌ك ل دۆر سه‌ره‌دانا سه‌رۆك نێچيرڤان بارزانى بۆ به‌غدا به‌لاڤكر.

د ده‌قێ راگه‌هاندنا سه‌رۆكاتيا هه‌رێمێ دا هاتيه‌:

به‌رێز سه‌رۆكێ هه‌رێما كوردستانێ د دويماهيك سه‌ره‌دان دا بۆ به‌غدا ل گه‌ل سه‌رۆكوه‌زيرێ ئيراقێ و لايه‌نێن سياسى دويماهى پێشهاتێن ره‌وشا ئه‌منى و سياسى يا وه‌لاتى به‌حسكرن و دوپاتى ل سه‌ر هه‌ڤكارى و هه‌ماهه‌نگيێ دناڤبه‌را هه‌مى لايه‌نان دا بۆ پشته‌ڤانيێ ل حكومه‌تا فيدرالى يا نوى يا ئيراقێ و سه‌رخستنا كارنامه‌يا وێ دا كرن هه‌روه‌سا پێكڤه‌كاركرن بۆ چاره‌سه‌ركرنا كێشه‌يێن هه‌ولێر - به‌غدا د مادده‌يا 140 دا هه‌روه‌سا بودجه‌ و شايسته‌يێن دارايى، ره‌وشا شنگالێ و كێشه‌يێن وه‌لاتى ب گشتى و دانوستاندن ل سه‌ر بنه‌مايێ ده‌ستوورى و پاراستنا سه‌قامگيرى و سه‌روه‌يا وه‌لاتى به‌حسكرن.

سه‌رۆك نێچيرڤان بارزانى و سودانى سه‌رۆكوه‌زيرێ ئيراقێ ب ته‌مامى د هه‌ڤڕا بوون و دوپاتكرن كو ب چ رێكان رێ ب چ جۆرێن گه‌فان و كريارێن سه‌ربازى ل سنوورێن ئيراقێ و هه‌رێما كوردستانێ به‌رانبه‌ر وه‌لاتێن جيران نه‌هێته‌دان، بۆ ڤێ مه‌ره‌مێ وه‌ك هه‌رده‌م دێ هاريكاريا په‌نابه‌ران هێته‌كرن، لێ رێ ب هه‌بوونا گرۆپێن چه‌كدار ل هه‌رێما كوردستانێ ناهێته‌ دان، له‌وا هه‌ولێر و به‌غدا ب ته‌مامى هاريكاريێ و هه‌ماهه‌نگيێ دكه‌ن و ئاسايشا سنووران دپارێزن، ل گه‌ل وه‌لاتێن جيران ژى دێ د هه‌ڤكار و هه‌ماهه‌نگ بن و رێكارێن پێدڤى دێ گرنه‌ به‌ر.

سه‌رۆك نێچيرڤان بارزانى پشتراستى دا و دوپاتى ل سه‌ر وێ چه‌ندێ كر كو هه‌رێما كوردستانێ وه‌ك هه‌رده‌م بۆ ئيراقێ و وه‌لاتێن جيران و ده‌ڤه‌رێ دێ بيته‌ فاكته‌رێ ئارامى و سه‌قامگيريێ، هه‌روه‌سا دخوازين په‌يوه‌نديان ل سه‌ر بنه‌مايێ رێزگرتن، جيرانيا باش و به‌رژه‌وه‌نديا هه‌ڤپشك به‌ره‌ڤ پێشڤه‌ ببه‌ين. د هه‌مان ده‌م دا، بۆ چاره‌سه‌ركرنا كێشه‌يێن ناڤخۆيى و ده‌ره‌كى ل ده‌ڤه‌رێ، ب پێدڤى دزانين كو هه‌مى لايه‌ن پشتبه‌ستنێ ل سه‌ر دانوستاندن، لێكتێگه‌هشتن و چاره‌سه‌ريێن ئاشتيانه‌ بكه‌ن بۆ ڤێ چه‌ندێ ژى سه‌ركردايه‌تيا هه‌رێما كوردستانێ به‌رهه‌ڤه‌ رۆله‌كێ ئه‌رێنى و بنياتنه‌ر د ڤى ده‌رباره‌ى دا بگريته‌ به‌ر.

سه‌رۆكاتيا هه‌رێما كوردستانێ

28/11/2022