لوقمان ئاسیهى
جارێ بینە پێش چاڤێن خوە کو ئەڤ مۆندیالا نهو ل قەتەرێ برێڤە دچت، یا ل کورستانێ برێڤە دچت. ئێکەم تشت، ئەم دا وێ بزاڤێ کین کو تا رێژەیەکا مەزن وەک ( مەزاهر) ئەم دا (تەقلیدا) دەرڤە کین، ڤێجە بگرە ژ ستران و جلکا و سەنی و مەنیا تا نوزا چ ژى. جارێ بلا کەس وێ هزرێ نەکت کو ئەز مرۆڤەکی رەشبینم، ئاخر هندەک جارا هندەک فەستیڤال ل دەف مە ژى چێدبن و مە ژى هندەک تشت یێن ب چاڤێ خوە دیتىن. 
قەتەرێ چ کر؟ دگەل وێ یەکێ کو روییەکێ جیهانى دایە وێ هەلکەفتا جیهانى یا مەزن، لێ مۆرا خوە یا قەتەرییا عەرەبى ل سەر پترییا هوورهوورکێن وێ هەلکەفتێ دایە. ئاگرێ مۆندیالێ کابرایەکێ عەرب ب دشداشەیەکێ عەربى و ل سەر پشتا هەسپەکێ عەربى خەتیرا خوە هلگرت و ئاگرێ مەشخەلێ هلکر. گەلەک جاران وەکى تو تەماشەى یاریگەهەکێ دکى، گەلەک جارا رەنگێ سپی ژ بەر دشداشا دیارە و گەلەک ژ کەسایەتییێن وان وەکى ل پێش یاریەکێ بەرهەڤدبن دشداشە و عەگالێن خوە دکنە بەر خوە و هیچ خوە کێم ژى نابینن. تشتێ دی یێ هەرە بالکێش، بازرگانیا کەفى و عەگالێن سۆر و زەر و شین و ...، ل گۆرەى رەنگێ درێسێن هەمى وەلاتان یێن بەرهەڤکرین و ب وێ رێ عەگال و دشداشەیێن خوە کرنە بەر ژاپۆنى و بەرازیلى و ئەمریکیان...، جامێرا ژ رەخەکێ ڤە مۆندیالەکا (دەرجە ئێک) هاڤێتن مەیدانێ و ژ رەخێ دى ڤە ب شانازى گەلەک جوان و ب پلان و ب رێک و پێکی کەلتۆرێ خوە ( بێی کو شەرمبکن) ب خەلکێ دانە ناسکرن.
ئەم کورد چ دکن؟ جلکێن کوردى ل دەوامێن فەرمى نە دورستن، یێ پچەکێ حال خوەش بوو، یان بوو تشتەک بەلکو شەرمدکت جلکێن کوردى بکتە بەر خوە، یێ پچەکێ خوە ( موسەقەف) دیت تژى ناڤ سوحبەتا خوە ئاخڤتنێن بیانى دکت. هەرە سەیرانگەهـ و خوارنگەهێن مە یێن پچەکێ مۆدرێن تنێ تو دێ گوهـ ل ستران و موزیکا بیانى و عەرەبى بى. هەرە شاهیێن مە وەکى بویکێ دئینن پێش کو نارینکێ و سەرێ زاڤای بێژن کو تاما سەمفۆنیا ژێ دئێت سترانەکا عەرەبى یان ئێکا بیانى ددانە سەر کو ئێک ب تنێ ژى تنێناگەهت کا چ دبێژت و سەمایێ ژى ل بەر دکن. 
ل ( باژێرەکێ) مە ئەز ل رەنگە هەلکەفتەکێ بەرهەڤبووم و من خەملا خوە ب جلک و شالا کوردى کربوو، (رەوشەنبیرەکێ) مە گۆتە من: ها گۆندى ما وەختێ ڤان جلکانە؟!
ببورن ل دوماهیێ دێ بێژم ئەم قەومەکین نە رێزێ ل دیرۆکا خوە دگرین نە ل ئالا خوە نە ل پیرۆزین خوە نە ل جلکێن خوە نە ل زمان و نە ل ئەدبیاتا خوە و نە ...، هەلبەت ئەڤێ چەندێ ژى سەدەمێن خوە هەنە و تنێ دبێژم عەفییە قەتەر.