گاڤ

ساخلەمییا هەولێرێ دیارکر وەلاتەییەکێ 47 سالی کو کارێ وی کڕین و فرۆشتنا ئاژەلییە پشتی کو پشکنین بۆ هاتینە کرن هۆسا دەرکەفتییە تووشی تایا خوینبەربوونێ بوویە.

تایا خوینبەربوونێ ژ ڤایرۆسەکێ بچویک دروستدبیت کو ئەو ڤایرۆسە دناڤا پیستێ ئاژەلان دا دژیت و گەشەیێ دکەت و بەهرا پتر تووشی وان کەسان دبیت یێن کارێ ب خودانکرنا ئاژەلی دکەن.

رێڤەبەرییا گشتی یا ساخلەمییا هەولێرێ، ئەڤرۆ، ئێکشەمبییێ، 29-6-2025، د بەیانەکێ دا راگەهاند؛ وەلاتەییەکێ تاخێ فەرمانبەران ل هەولێرێ تووشی تایا خوینبەربوونێ بوویە.

دیارکر ژی؛ ژییێ وی 47 سالن و کارێ کڕین و فرۆشتنا ئاژەلی ل مەیدانا ئاژەلان دکەت و دهەمان دەم دا ئاژەلان ل مالان سەرژێدکەت، ئانکو گۆشتفرۆشێ گەڕۆکە.

گۆت ژی: ل 21 ڤێ مەهێ نەخۆش بوویە، سەرئێش و زکچوون ل دەڤ دروستبوویە، پشتی پشکنین بۆ هاتینە کرن هۆسا دیاربوویە تووشی نەخۆشییێ بوویە.

دا زانین ژی؛ نوکە ل نەخۆشخانەیێ ل ژێر چاڤدێرییا نۆشداران چارەسەرییێ وەردگریت.

ل 3-6-2025، ساخلەمییا زاخۆ راگەهاندبوو؛ کەسەک ل زاخۆ تووشی تایا خوینبەربوونێ بوویە و شڤانێ پەزی یە.

ل 10-5-2025، سه‌گڤان سلێمان، رێڤه‌به‌رێ نه‌خۆشخانه‌یا ئازادى ل پارێزگه‌ها دهۆكێ بۆ گاڤ گۆتبوو: ئێكه‌م تووشبوویا تایا خوینبه‌ربوونێ ژیانا خۆ ژ ده‌ستدا.

سلێمانى دابوو زانین ژى: ژییێ وێ 45 سالن و چ حاله‌تێن دى ل پارێزگه‌ها دهۆكێ نه‌هاتینه‌ تۆماركرن.

ل 22-5-2025، حالەتەکێ دی یێ تایا خوینبەربوونێ ل دهۆکێ هاتبوو تۆمارکرن، نەخۆشخانەیا ئازادی راگەهاندبوو؛ پشکنینێن وێ هاتبوونە هنارتن بۆ بەغدا و تێدا دیاربوویە هەلگرا نەخۆشییێ یە.

دیار ژی کربوو؛ ئەڤ ژنە بەرکەفتییا وێ ژنێ بوو یاکو ل (10-5-2025) ژ ئەگەرێ تایا خوینبەربوونێ ژیانا خۆ ژ دەستدایی، ژییێ وێ نێزیکی45  سالانە و خەلکا دەڤەرا شێلادزێ یە.