گاڤ

یاریکەرێ یانەیا ئەتلەتیک بلباو نیکۆ ویلیامزی ب رەنگەکی نە چاڤەرێکری گرێبەستا خۆ تا سالا 2035ێ ل گەل یانەیا خۆ نوی کر، رۆژنامەڤانەکێ دیار ژی دبێژیت: ژ بەر کێشەیا ناڤ تۆمارکرنێ بەرشەلۆنا خۆ ژ گرێبەستێ ڤەکێشا.

یانەیا ئەتلەتیک بلباو ب گرتەڤیدیۆیەکێ نیکرنا گرێبەستا ستێرا خۆ نیکۆ ویلیامزی تا سالا 2035ێ راگەهاند، ل دەمەکێ جیهان هەمی چاڤەرێی وێ یەکێ بوون ویلیامز گرێبەستا یانەیا بەرشەلۆنا ئیمزا بکەت و بۆ وەرزێ بهێت ل گەل یانەیا کەتەلۆنی مل ب ملێ لامیم یامالی یارییی بکەت.

نیکۆ ویلیامزی پشتی ئیمزاکرنا گرێبەستا خۆ راگەهاند: "دەمێ بەحس ل بریاردانێ دهێتە کرن بۆ من گرنگترین تشت ئەوە گوهێ خۆ بدەم دلێ خۆ، ئەز ل وی جهی مە کو پێدڤییە لێ بم، ل گەل پشتەڤانین خۆ بم، بلباو مالا منە".

ژ ئالییێ خۆ ڤە، فابریزیۆ رۆمانۆ، رۆژنامەڤانێ دیار یی مێرکاتۆیێ راگەهاند: ژ بەر کێشەیا ناڤ تۆمارکرنێ، بەرشەلۆنا خۆ ژ گرێبەستا نیکۆ ویلیامزێ ڤەکێشا.

ل گۆرەی زانیارییان بهایێ شکاندنا گرێبەستا نیکۆ ویلیامزی ل گەل یانەیا باسکی تا دەهـ سالێن دی 96 ملیۆن یورۆنە.