گاڤ

وەزارەتا هەرێما کوردستانێ رۆهنکرنەک ل دۆر بەیانا ئیراقێ دا و دیارکر، بەغدا زێدەگاڤییێن سەر ئێمناهییا هەرێما کوردستانێ پەردەپۆش دکەت و خۆ ژ بەرپرسیارەتییێ دڤەدزیت.

په‌یڤدارێ محه‌مه‌د شیاع سوودانى، سه‌رۆكوه‌زیرێ ئیراقێ راگه‌هاندبوو، ئه‌وا وه‌زاره‌تا ناڤخۆ یا هه‌رێما كوردستانێ ده‌ركرى ده‌رباره‌یى تۆمه‌تباركرنا هێزێن فه‌رمى یێن ئیراقێ كاره‌كى ره‌تكری‌ و شه‌رمزاركرییه‌ و ب چ بەهانه‌یان یا رێپێدایی نینه‌.

وەزارەتا هەرێما کوردستانێ، ئەڤرۆ، شەمبییێ، 5-7-2025، د بەیانەکێ دا راگەهاند؛ ژ ئالییێن پەیوەندیدار یێن حکومەتا فیدرال دهێتە چاڤەرێکرن ل دەمێ گەف ل سەر هەرێما کوردستانێ یان هەر دەڤەرەکا دی یا ئیراقێ، ژپێخەمەت دیارکرنا راستییان و رێگریکرن ژ دوبارەبوونا گەفان و سزانادانان وان کەسان یێن هێرشان دکەن، پێرابوونێن پێدڤی بگریتەبەر، لێ ب لیبۆرین ڤە، هەست ب وێ یەکێ دهێتەکرن کو جۆرەکێ پەردەپۆشکرنێ یان خۆڤەدزین ژ بەرپرسیارەتییێ هەیە ل هەمبەری وان زێدەرەوییێن ئەمنی یێن ل دژی هەرێما کوردستانێ دهێنەکرن.

دیارکر ژی؛ ل سالێن بۆری ب دەهان جاران، ب دۆرن و مۆشەکان هێرشی هەرێما کوردستانێ دهاتەکرن، هەرچەندە ئاراستە و ژێدەرێ مۆشەک و درۆنان د دیاربوون و چەندین جاران لیژنەیێن هەڤپشک ژ هەولێر و بەغدایێ دروستبوون، لێ هەمجا ب لێبۆرین ڤە، نە دەرئەنجامێن لێکۆلینان بۆ رایا گشتی دهاتنە ئاشکراکرن و نە کەس ل سەر ڤان تاوان و کریارێن نەیاسایی دهاتە سزادان و چ پێرابوون ل دژی چ ئالییان نەهاتنە گرتن.

وەزارەتا ناڤخۆ دا زانین ژی؛ سەقایێ سیاسی و هزروبیرێن سیاسی یێن ئالییان د هەر رەوشەکێ دا بن، پاراستنا ئاسایشا وەلاتی و رێگریکرنا ئارمانجگرتنا ژیان وەلاتییان، سەروەری و سەقامگیرییا وەلاتی ئەرکێ دەستپێکی یێ سازییێن فەرمی یێن هەردو حکومەتێن فیدرال و حکومەتا هەرێما کوردستانێ یە.

ئەڤە د دەمەکی دایە، وەزارەتا ناڤخۆ یا حکومەتا هەرێما کوردستانێ، دوهی رۆهنکرنەک بەلاڤکربوو و راگەهاندبوو؛ دناڤا هژمارەکا میدیایێن ئەلکترۆنی یێن فەرمی ل ئیرانێ هۆسا هاتییە بەلاڤکرن کو شەڤا بۆری ل هەولێرێ ب درۆنان هێرشی بنگەهەکێ سەر ب ئسرائیلێ ڤە هاتییەکرن.

دیارکربوو ژی؛ ئەو نووچەیە هەمی ساختەنە و د دویرن ژ راستییێ، نە بنگەهێن ئسرائیلی ل کوردستانێ هەنە و نە ئۆپەراسیۆنێن هۆسا هاتینەکرن.

ئاشکراکربوو ژی؛ شەڤا بۆری درۆنەک ل دەڤەرەکا چوول ل نێزیکی هەولێرێ کەفتە خوار، ئەڤ هێرشە ژی ژ ئالییێ هندەک گرۆپێن سەر ب حەشدا شەعبی ڤە ب مەرەما تێکدانێ دهێنەکرن. پێدڤییە ئالییێن پەیوەندیدار ل حکومەتا فیدرال سنۆرەکی بۆ ڤان کارێن تێکدەرانە بدانن و پێرابوونێن یاسایی بەرامبەر تاوانباران بگرنەبەر.

هەڤدەم، وەک بەرسڤدانەک سه‌باح نەعمان، په‌یڤدارێ محه‌مه‌د شیاع سوودانى، سه‌رۆكوه‌زیرێ ئیراقێ و فه‌رمانده‌یێ گشتى یێ هێزێن چه‌كدار، ئەڤرۆ راگه‌هاند، ئه‌وا وه‌زاره‌تا ناڤخۆ یا هه‌رێما كوردستانێ ل دۆر تۆمه‌تباركرنا هێزێن فه‌رمى یێن ئیراقێ ده‌ركرى، كاره‌كى ره‌تكری‌ و شه‌رمزار كرییه‌ و ب چ بهانه‌یان یا رێپێدایی نینه‌.

نەعمانی دیارکربوو ژی؛ ئه‌گه‌ر به‌لگه‌ هه‌بن بلا پێشكێشى ئالییێن فه‌رمى یێن حكومه‌تا ئیراقێ بكه‌ن.

گۆتبوو ژی: حكومه‌تا فیدرال چ ده‌مان ل سه‌ر كیستی ئاسایشا وه‌لاتى ده‌ستبه‌ردار و دودل نابیت و دێ پێرابوونێن یاسایی و توند ل هه‌مبه‌رى هه‌ر ئالییەکی گریتەبەر یێ کو سه‌قامگیرییا ئیراقێ تێکبده‌ت.

ئاشکراکربوو ژی؛ گوهۆڕینێن نوكه‌ ب رێیا ده‌رگه‌هێن فه‌رمى پێدڤى ب هه‌ڤسه‌نگى و هاریكاریێنه‌، نه‌ک په‌نابرن بۆ داخویانى و كه‌نالێن راگه‌هاندنێ چونكى ئه‌ڤ كاره‌ ده‌لیڤه‌یێ ل هه‌مبه‌رى نه‌حه‌ز و ئالییێن دوژمنكار ڤەدکەت کو بێرێزیێ ب سازییان بكه‌ت و زیانێ بگەهینیتە سه‌قامگیرییا ئیراقێ.