گاڤ

ئوزگور ئوزەل سەرۆکێ جەهەپێ گەف ل سەرۆککۆمارێ تورکیا کرن و راگەهاند؛ ئەز باش دزانم کا دێ کەنگی خەلکی داخواز کەمە سەر جاددەیێ، ئەگەر راستە تو بتنێ ژ خودێ دترسی، وەرە هەلبژارتنان.

پۆلیسێن تورکیا ئەڤرۆ ب فەرمانا سەرۆکایەتییا داخوازکەرێ گشتی یا ئەنتالیا، سێ سەرۆک-باژێرڤانییێن، سەر ب پارتییا جەهەپێ ڤە دەستەسەرکرن.

ئوزگور ئوزەل، سەرۆکێ پارتییا گەل یا کۆماری (جەهەپە)، ئەڤرۆ، شەمبییێ، 5-7-2025، پەیامەک ئاراستەیی رەجەب تەییب ئەردۆگان، سەرۆککۆمارێ تورکیا کر و راگەهاند؛ ئەگەر تە پیچەکا شەڕەف، نامویس و ئەخلاقی هەبیت بەرسڤا گەندەلییێن خۆ بدە.

ئوزەلی دیارکر ژی؛ ئەز باش دزانم کا دێ کەنگی خەلکی داخواز کەمە سەر جاددەیێ، ئەڤجا وەنەکە خەلکی ب رژینمە سەر جاددەیان.

گۆت ژی: هەر گاڤەکا من داخوازکر، وی دەمی تو دێ حالێ خۆ بینی، ڤێجا ئاقلێ خۆ بئینە سەرێ خۆ، ئەگەر راستە تو تنێ ژ خودێ دترسی، وەرە هەلبژارتنان.

ئەڤە د دەمەکی دایە، ئۆپەراسیۆنا دەستەسەرکرنا سەرۆک-باژێرڤانییێن پارتییا گەل یا کۆماری (جەهەپە) دا ژ ئالییێ حکومەتا تورکیا ڤە ب تۆمەتا گەندەلییا دارایی بەردەوامە و هەر ئەڤرۆ سێ سەرۆک-باژێرڤانییێن پارتییا ناڤبری هاتنە دەستەسەرکرن.

د چارچووڤەیێ دۆسیەیەکا گەندەلییێ دا، ب فەرمانا سەرۆکایەتییا داخوازکەرێ گشتی یا ئەنتالیا، هەر ئێک ژ زەیدان کارالار، سەرۆکێ مەزنە-باژێرڤانییا ئەدەنە، عەبدولرەحمان توتدەرە، سەرۆکێ باژێرڤانییا سەمسوورا باکورێ کوردستانێ و موهیتین بۆجەک، سەرۆکێ مەزنە-باژێرڤانییا ئەنتالیا هاتنە دەستەسەرکرن.

هەورەسان، ل ئەینییا بۆری، د چارچووڤەیێ دۆسیەیەکا گەندەلییێ دا ل باژێرڤانییا مەزن یا ئیزمیرێ، 60 کەس هاتنە رەوانەکرن بۆ زیندانێ و هەر ئێک ژ تونچ سۆیەر، سەرۆکێ پێشتر یێ مەزنە-باژێرڤانییا ئیزمیرێ و شەنگۆل ئاسلانئۆگڵو، سەرۆکێ لقا رێکخستنێن جەهەپێ دناڤ وان گرتییان دا بوون.

د هەلبژارتێن باژێرڤانییێن تورکیا دا ل سالا 2024ێ، زەیدان کارالار 46.72% یا دەنگان بدەستڤەئینابوون، موهیتین بۆجەک 71.48% و عەبدولرەحمان توتدەرە 49.74% یا دەنگان بدەستڤەئینابوون.