گاڤ

هونەرمەندەکێ کورد ل باژارێ مویسلێ نشتەرگەرییەکا دەگمەن بۆ دهێتەکرن ژ بەر هەستییارییا نشتەرگەریێ نەچارە عودێ بژەنیت و سترانان ژی بێژیت.

دبیت تو هزر بکەی ئەڤ کارە بۆ خۆشی هاتییەکرن لێ د راستی دا نەچارییە، هونەرمەندەکێ کورد ل نەخۆشخانەیا حەیات یا نێڤدەولەتی ل باژێری مویسلێ نشتەرگەرییەکا دەگمەن و هەستیار بۆ دهێتەکرن نشتەرگەری راکرنا گرێیەکێ یە ل سەر مەژییێ وی لێ یا سەیر ئەو مژویلی لێدانا عودێ یە و نوشدار ژی د بەر ستران و لێدانا عودێ را لسەر نشتەرگەریێ بەردەوامن.

د.ئووسامە مەشهەدانی دامەزرێنەرێ نەخۆشخانەیا حەیات یا نێڤدەولەتی و سەرۆکێ زانکۆیا نەینەوا یا حکومی راگەهاند: نەخۆش هونەرمەندەکێ باژێرێ زاخۆ یە گرێیەک ل سەر مەژی هەبوو نشتەرگەری یا ئالۆز و هەستیار بوو و پێدڤیبوو نەخۆش ب تەمامی ل سەر هشێن خۆ بیت.

 دا زانین ژی: لێدانا عودێ بۆ خۆشی نەبوو بەلکو پلانەکا نوشداری یا خاندی بوو مەرەم پێ چاڤدێریکرنا لڤینێن دەماران بوو ل دەما نشتەرگەرییێ تایبەت لڤینێن دەستان ژ بۆ کو ل دەما راکرنا وێ گرێکێ گرەنتییا وێ یەکێ بهێتە کرن کا ئایا مەژی دروست ب ئەرکێن خۆ رادبیت یان ژی نە.

ئاشکرا ژی کر: نشتەرگەری ل سەر دەستێ نوشدارێ ب ناڤودەنگێ ئیراقی یەحیا ئەلجحێشی هاتە کرن و ژ بەر هەستییارییا نشتەرگەریێ هەمی ئامیر و کەلوپەلێن ناڤا ژوورا نشتەرگەریێ هاتبوونە تافیلکرن.

نوشدار مەشهەدانی دا زانین ژی: ئەڤ جورە نشتەرگەرییە ل سەر ئاستێ جیهانێ گەلەک کێم هاتینە ئەنجامدان، پێشتر ب تەنێ ل وەلاتێین سویسرا و فرەنسا هاتینە ئەنجام دان لێ ل ئیراقێ ئەڤە ئێکەم جارە نشتەرگەرییەکا هوسا دهێتە کرن.

ل دویماهییێ ژی گۆت: ئەو چاڤەرێیی ئەنجامێن نشتەرگەریێ نە د هەمان دەمی ژی دا ب هیڤی نە ئەڤ نشتەرگەرییا هاتییەکرن گاڤەکا گرنگ و سەرکەفتی بیت د بوارێ نشتەرگەریێن دەماران ل سەرانسەری ئیراقێ.

ڤیدیۆیێ ببینە د ئەڤی لینکی دا

https://www.facebook.com/gavtvnetwork/videos/1434836340979698