گاڤ

کۆمپانییا دی ئێن ئۆ راپۆرتا خۆ یا چارێکا سالێ بەلاڤکر و راگەهاند؛ د سێ مەهێن ئەڤ سالە دا ب تێکرا 74 هزار و 760 بەرمیلێن پەترۆلێ هاتینە بەرهەمئینان.

ئەڤرۆ، پێنجشەمبییێ، 24-7-2025، کۆمپانییا دی ئێن ئۆ یا نەرویچی د راپۆرتا خۆ دا راگەهاند؛ د سێ مەهێن ئەڤ سالە دا، ل هەرێما کوردستانێ ب تێکرا 74 هزار و 760 بەرمیلێن پەترۆلێ رۆژانە هاتینە بەرهەمئینان.

دیارکر ژی؛ ئەڤ ژمارەیە ب هەڤبەری ل گەل سالا بۆری 82 هزار و 81 بەرمیلێن پەترۆلێ بوون، ب ڤێ چەندێ ژی 6.3% بەرهەمئینان داکەڤتییە.

دی ئێن ئۆ دیارکر ژی؛ پشکا کۆمپانییێ ژ بەرهەمئینانا پەترۆلێ ل هەردو زەڤییێن تاوکێ و پیشخابوورێ ب هەڤپشکی ل گەل کۆمپانیا سەرکار د چارێکا دویێ یا ئەڤ سالە دا ژ 79 هزار و 783 بەرمیلێن پەترۆلێ رۆژانە، بتنێ 18 هزار و 675 بەرمیل بووینە.

دی ئێن ئۆ هەروەسان دازانین ژی؛ هەمی هویرکاتی، داتا و ژمارەیێن دارایی یێن کۆمپانییێ دێ ل 21ێ مەها تەباخا ئەڤ سالە ب رێیا ڤیدیۆ کۆنفرانسەکی هێنە نیشاندان.

ئاشکراکر ژی؛ ژبەر کو هەتا نوکە بۆڕیا پەترۆلێ یا هەرێما کوردستانێ بۆ تورکیا نەهاتییە ڤەکرن، لەوما هەمی ئەو پەترۆلا دهێتە بەرهەمئینان، د بازارێ ناڤخۆ یێ هەرێما کوردستانێ دا دهێتە فرۆتن.

کۆمپانییا دی ئێن ئۆ ئێک ژ وان هەشت کۆمپانییایە یا کو د کۆمەلەیا پیشەسازی یا پەترۆلا هەرێما کوردستانێ (ئەپیکۆر) دا کاردکەت و 60% ژ پەترۆلا هەرێما کوردستانێ ژ ئالییێ وان ڤە دهێتە بەرهەمئینان، بەری پەترۆلا هەرێما کوردستانێ ل 25-3-2023، رۆژانە 250 هزار بەرمیلێن پەترۆلێ رۆژانە، ژ ئالییێ وێ ڤە دهاتە بەرهەمئینان.