گاڤ

کۆمسیۆنا بلند یا هەلبژارتنێن ئیراقێ راگەهاند؛ جڤاتا کۆمسیاران کۆمبوو و دانوستاندن ل دۆر یاداشتنامەیا سەرۆکێ نڤیسینگەها هەلبژارتنان کر و بڕیار هاتەدان ل 9ـی تەباخێ، تیرۆپشک بۆ ژماره‌یا هەڤپەیمانی، پارت و کاندیدان بهێتەکرن.

ئەڤرۆ، دوشەمبییێ، 28-7-2025، کۆمسیۆنا بلند یا سەربەخۆ یا هەلبژارتنێن ئیراقێ راگەهاند؛ جڤاتا کۆمسیاران کۆمبوو و دانوستاندن ل دۆر یاداشتنامەیا سەرۆکێ نڤیسینگەها هەلبژارتنان ل دۆر بجهئینانا میکانزما تیرۆپشکێ بۆ ژمارەیا هەڤپەیمانی، پارت و کاندیدان بۆ هەلبژارتنێن بهێن یێن جڤاتا نوینەرێن ئیراقێ هاتەکرن.

دیارکر ژی؛ ل 9ـی تەباخێ، دێ تیرۆپشک بۆ راکێشانا ژماره‌یا هەڤپەیمانی، پارت و کاندیدان هێتەکرن.

ئەڤە د دەمەکی دا یە، ل 17-7-2025، ده‌سته‌یا كۆمسیارێن کۆمسیۆنا بلند یا سەربەخۆ یا هەلبژارتنێن ئیراقێ سیستەمێ دەنگدانێ، هژمارتن و ڤاڤارتنا دەنگان بۆ هەلبژارتێن بهێن یێن جڤاتا نوینەرێن ئیراقێ پەسەندکر.

هەروەسان دیارکربوو ژی؛ نڤیسینگەها هەلبژارتنان هاتییە راسپاردن بۆ وێ یەکێ پێرابوونێن پێدڤی بگریتەبەر دا کو ئەڤ سیستەمە د هەلبژارتنان بهێتە بجهئینان.

ل 10-7-2025، حەسەن هادی، ئەندامێ راگەهاندنا کۆمسیۆنا بلند یا سەربەخۆ یا هەلبژارتنێن ئیراقێ راگەهاندبوو؛ هەوا بانگەشەیا هەلبژارتنێن بهێن یێن جڤاتا نوینەرێن ئیراقێ، ل 9ێ چریا ئێکێ دەستپێدکەت و ل 8ێ چریا دویێ، ئانکو 24 دەمژمێران بەری دەستپێکرنا دەنگدانا تایبەت ب دویماهی دهێت.

ل 9-4-2025، نڤیسینگەها محەمەد شیاع سوودانی، سەرۆکوەزیرێ ئیراقێ راگەهاند؛ ب پترییا دەنگان، جڤاتا وەزیران 11ێ چریا دویێ یا ئەڤ سالە وەک رۆژا هەلبژارتنێن جڤاتا نوینەرێن ئیراقێ بۆ خۆلا شەشێ دەستنیشان کر.