گاڤ

محەمەد شیاع سوودانی، سەرۆکوەزیرێ ئیراقێ د هەڤپەیڤینەکێ دا بۆ ئاژانسا ئەسۆشیەتێد پرێس بەحسێ رەوشا ناڤخۆ یا ئیراق و هەرێما کوردستانێ، شەرێ ئسرائیل و ئیرانێ و رەوشا سووریێ کر.

دەربارەێ هێرشێن درۆنی سوودانی گۆت: هێرشێن ل سەر پەترۆلگەهێن هەرێما کوردستانێ تیرۆرستی نە. دەستهەلاتدارێن هەرێمێ حەشدا شەعبی ب وان هێرشان تۆمەتباردکەت.

هەروەسا گۆت: حکومەتا فیدرالی ل گەل حکومەتا هەرێمێ لژنەیەک پێکئینایە بۆ ئاشکراکرنا هێرشکەران.

دەربارەی شەرێ ئسرائیل و ئیرانێ ژی گۆت: مە ئیراق ژ شەرێ ئسرائیل و ئیرانێ دویرکر. هندەک گرۆپان بزاڤکرن هێرشی ئسرائیلێ بکەن، لێ مە رێگرێ ل 29 هێرشان ل ناڤا ئاخا ئیراقێ بۆ سەر ئسرائیلێ کر.

دەربارەی هەبوونا ئەمریکا و هێزێن هەڤپەیمانییا نێڤدەولەتی ل ئیراقێ گۆت: ئەو دێ ل دویماهییا ئەڤ سالە ل گەل ئەمریکا کۆمبن و رێککەفتنا خۆ یا ئەمنی ئێکلاکەن، ئیراق دخوازیت وەبەرهێنانا ئابۆری یا ئەمریکی د پەترۆل و غازێ دا بهێنە گرەنتیکرن، لێ د هەمان دەم دا هەبوونا هەڤپەیمانییا نێڤدەولەتی بەهانەیێ ددەتە گرۆپێن چەکدار خۆ پرچەک بکەن، لێ ئەگەر دەرکەفتنا هەڤپەیمانان بدویماهی هات، وان چ بەهانە نامینن چەکی ب هەلگرن.