گاڤ

جێگرێ سەرۆکێ جڤاتا نوینەرێن ئیراقێ راگەهاند؛ پێدڤییە نەتەوەیێن ئێکگرتی و جڤاکا ناڤدەولەتی، بزاڤان بۆ راکرنا دۆرپێچا ل سەر غەززە بکەن، برسیکرنا ژن و زارۆکان تاوانێن دژی مرۆڤاتییێ نە.

ئەڤرۆ، پێنجشەمبییێ، 31-7-2025، شاخەوان عەبدوللا، جێگرێ سەرۆکێ جڤاتا نوینەرێن ئیراقێ د گۆتارەکێ دا ل بارەگەهێ نەتەوەیێن ئێکگرتی ل جنێفا سویسرا راگەهاند؛ سەرباری وان قەیران و شەڕێن رویبروی وێ بووین، ئیراق یا رژدە ل سەر وێ یەکێ کو ببیتە پشکەک ژ چارەکرنا کێشەیان، هەردەم دەنگ ب پشتەڤانییا سەقامگیری و ئاشتییێ دا یە.

دیارکر ژی؛

عەبدوللایی گۆت ژی: ئیراقێ هەردەم بزاڤ بۆ وێ یەکێ کرینە د چارچووڤەیێ دادپەروەری و هەڤسەنگییێ دا، ببیتە پشکەکا راستەقینە و ستراتیژی یا دارشتنا پاشەرۆژا ناڤدەولەتی.

هەروەسان دازانین ژی؛ یا ئەڤرۆ رویددەت برسیکرنا ژن، زارۆک و دانعەمران، تاوانێن مەزن یێن دژی مرۆڤاتییێ نە، دا کو دۆرپێجا ل سەر کەرتێ غەززە نەمینیت و خەلکێ وێ بهێتە قۆرتالکرن؛ پێدڤییە نەتەوەیێن ئێکگرتی و جڤاکا ناڤدەولەتی، دەستوەردانێن ئێکسەر و بلەز بکەن.

عەبدوللایی دیار ژی کر؛ ئیراق ل سەر ئاستێ حکومەت و خەلکێ خۆ، پشتەڤانەکا بەردەوام یا دۆزا فلستینێ یە.

ئەڤە د دەمەکی دا یە، سێشەمبییێ، 29-7-2025، ساخلەمییا غەززە یا سەر ب تەڤگەرا حەماس ڤە راگەهاندبوو؛ ل گۆرەیی ئاماران ژ ئەگەرێ شەڕێ ل گەل ئسرائیلێ، ژ 7ێ مەها چریا ئێکێ یا سالا 2023ێ، 60 هزار و 34 کەسان گیانێ خۆ ژ دەستدایە.

دیارکر ژی؛ پترییا وان کەسێن هاتینە کوشتن و بریندارکرن ژن و زارۆکن.

ل دۆر هژمارا برینداران دیارکر ژی؛ 145 هزار و 870 کەسان هاتینە بریندارکرن.

ساخلەمییا غەززە گۆت ژی: ژ بەرێ سپێدەهییا رۆژا دوشەمبییێ هەتا بەرێ سپێدەهییا رۆژا سێشەمبییێ 112 کەس هاتینە کوشتن و 22 کەس ژوان ل دەما وەرگرتنا هاریکارییێن مرۆڤی هاتینە کوشتن.

دیارکر ژی؛ هەتا نوکە پتری 124 کەسان ژ ئەگەرێ برسێ و نەبوونا خوارنێ گیانێ خۆ ژ دەستدایە و 80 ژوان ژی زارۆکن.