گاڤ

کۆمسیۆنا بلند یا هەلبژارتنێن ئیراقێ راگەهاند؛ دەمێ خۆ تۆمارکرنێ بۆ سەر سندۆقێن دەنگدانێ هەتا 5ێ تەباخێ هاتە درێژکرن.

ئەڤرۆ، پێنجشەمبییێ، 31-7-2025، کۆمسیۆنا بلند یا سەربخۆ یا هەلبژارتنێن ئیراقێ راگەهاند؛ دەمێ پێشکێشکرنێ بۆ کارمەندبوونا سەر سندۆقێن دەنگدانێ بۆ هەلبژاتنێن جڤاتا نوینەرێن ئیراقێ هەتا 5ێ تەباخێ هاتە درێژکرن.

دیارکر ژی؛ هەرکەسێ بخوازیت ل سەر سندۆقان ببیتە کارمەند، هیڤییە لەزێ د تۆمارکرنا ناڤێ خۆ دا بکەت.

ئەڤ د دەمەکی دا یە، ل 8-7-2025، ڤێ مەهێ کۆمسیۆنا بلند یا هەلبژارتنێن ئیراقێ راگەهاندبوو؛ دەمێ پێشکێشکرنێ بۆ کارمەندبوونا سەر سندۆقان هەتا 20ێ مەهێ هاتە درێژکرن.

هەروەسان، کۆمسیۆنا بلند یا سەربخۆ یا هەلبژارتنێن ئیراقێ، ئەینییێ، 18-7-2025، راگەهاندبوو؛ ل گۆرەیی نویترین ئاماران، هەتا نوکە 771 هزار و 655 کەسان، ناڤێ خۆ بۆ هەلبژارتنێن چریا دویێ یێن ئەڤ سالە تۆمارکرییە.

ئاشکراکربوو ژی؛ ل پارێزگەها دهۆکێ، 30 هزار و 683 کەسان ناڤێ خۆ تۆمارکرییە، 14 هزار و 986 زەلامن و 15 هزار و 697 کەس ژی ژن، هەروەسان، 7 هزار و 938 کەس ژوان فەرمانبەرن و 22 هزار و 745 ژی قوتابی و دەرچوویێن زانکۆ و پەیمانگەها نە.

ل 9-4-2025، نڤیسینگەها محەمەد شیاع سوودانی، سەرۆکوەزیرێ ئیراقێ راگەهاند؛ ب پترییا دەنگان، جڤاتا وەزیران 11ێ چریا دویێ یا ئەڤ سالە وەک رۆژا هەلبژارتنێن جڤاتا نوینەرێن ئیراقێ بۆ خۆلا شەشێ دەستنیشانکر.